Elordadaǵy №2 Saryarqa aýdandyq sotynda Densaýlyq saqtaý eks-mınıstri Eljan Birtanov pen burynǵy vıse-mınıstr Oljas Ábishevke qatysty kezekti sot otyrysy ótip jatyr, dep habarlaıdy Almaty-akshamy.kz Baq.kz-ke silteme jasap.
Prokýror Baýyrjan Shekenov vedomstvonyń burynǵy basshylaryna qatysty qandaı aıyp taǵylyp otyrǵanyn málimdedi.
Birtanovty medısınalyq mekemelerdiń qyzmetin avtomattandyrý men ony basqarý úshin aqparattyq júıeni ázirleý kezinde qyzmettik ókiletin asyra paıdalandy dep kinálap otyr. Belgili bolǵandaı, 2015 jyldyń jeltoqsanynda Densaýlyq saqtaý mınıstrligi horvatıalyq Ericsson Nikola Tesla fırmasymen platformany bir jyl ishinde jetkizý úshin 17,8 mln dollarǵa kelisimshart jasasqan. Alaıda atalǵan merzimde platformany iske qosyp úlgermegen.
«Platformany kórsetilgen merzimde aıaqtaý úshin Birtanov respýblıkalyq búdjettiń qarajatynan 6,8 mln dollar nemese 2,9 mlrd teńge qosymsha bólýge ótinish jiberý týraly sheshim qabyldaǵan. 2018 jyly 6 maýsymda Birtanov óziniń zańsyz nusqaýyn oryndaýdy qamtamasyz etý úshin tanysy Ábishevti vıse-mınıstr laýazymyna taǵaıyndaǵan», - dep atap ótti prokýror.
Aıyptaýshylardyń nusqasy boıynsha, Birtanov 2018 jylǵy 5 qazandaǵy №569 buıryǵy arqyly qyzmettik ókilettiligin asyra paıdalanyp, pılottyq eksplýatasıaǵa aıaqtalmaǵan platformany engizgen.
«Al 2018 jyly 11 jeltoqsanda Ábishev mınıstr Birtanovtyń zańsyz nusqaýyn oryndaı otyryp, platformanyń pılottyq eksplýataýsıanyń sátti aıaqtalǵany týraly sertıfıkat bergen. Osy oraıda, platforma boıynsha barlyq jumystar oryndalmady jáne onyń tolyqtaı iske qosylýyn jetkizýshi qamtamasyz etpedi», - dedi prokýror.
Sonymen qatar Eljan Birtanovqa 2020 jyly pandemıa bastalǵan kezeńde sanavıasıanyń bortyn paıdalanýǵa qatysty aıyp taǵyldy.