25 qazan – Respýblıka kúnine oraı №169 mektep-lıseıinde «Meniń qalam – meniń maqtanyshym» atty merekelik konsert ótti. İs-shara barysynda oqýshylar men ardagerler kezdesti. Merekelik konsertke Almaty qalasynyń ardagerler keńesiniń músheleri, ustazdar men oqýshylar qatysty.
– Búgingi is-shara jalpy birtutas tárbıege baǵyttalǵan. Túrli tárbıe jumystaryna baılanysty ártúrli sharalar uıymdastyryp jatyrmyz. Negizgi maqsatymyz – jastar arasynda bilimmen qatar tárbıeni nasıhattaý. Respýblıka kúni qarttar aılyǵyna sáıkes kelip otyr. Osy merekeni paıdalanyp, alǵa jetekteýshi urpaqpen keıingi býyndy kezdestirip jatyrmyz. Sebebi qazaqta «qarttar – bizdiń qazynamyz» degen jaqsy sóz bar. Olar ózderiniń aqyl-keńesterimen bólisip, oqýshylarǵa izgi tilekterin aıtady, – dedi №169 mektep-lıseıiniń dırektory Patshagúl Almaǵambetova.
Merekelik konsert barysynda oqýshylar ónerlerimen kórermenderdi tańǵaldyrdy. Biri án shyrqasa, biri qalamyzǵa arnap óleń shýmaqtaryn oqydy. Ardagerler oqýshylardyń ónerine tánti bolyp, izgi tilekterin bildirdi.
– Búgin úlken mereke ótip jatyr. Bul mektep týraly kóp sóz aıtýǵa bolady. Bárimiz biletindeı, 1990 jyly BUU 1 qazandy qarttar kúni dep belgilegen bolatyn. Al bizde Almaty qalasynda bul aı qarttar aılyǵy dep atalady. Bul aı biz úshin úlken mereke. Ártúrli is-sharalar, sporttyq jarystar men kezdesýler ótkizemiz. Mundaı sharalardy ótkizýdegi maqsatymyz – jastardy mektep tabaldyryǵynan bastap patrıottyqqa tárbıeleý. Úlkendi syılaý, Otandy súıý, kishige izet kórsetý sıaqty jaqsy qasıetterdi nasıhattaımyz, – dedi Alataý aýdany ardagerler keńesiniń tóraǵasy Saǵatýlla Taýbaldy.