Prezıdentimiz Qasym-Jomart Toqaevtyń búgingi Joldaýy kókeıimizde júrgen kóp suraqqa jaýap alýǵa múmkindik berdi. Kóńilge qondy. Ár saladan aıtylǵan áńgimeler búgingi halyqtyń saýalyna jaýap boldy. Depýtattarǵa artylǵan jumystar, aıtylǵan tilekter olardyń sapasyn arttyryp, sanyn azaıtý, ásirese, halyqpen birge bolý degeni kóńilimizge qondy.
Bılik halyqtan alystap ketkeli kóp ýaqyt boldy. Halyqpen sóılespegeli kóp ýaqyt boldy. Mine, sodan ketken qatelikti túzeý, jańa Qazaqstandy jańa jolǵa qoıý deý bizdiń kókeıimizge qonady. Ásirese, jastardyń rýhanı tárbıeden alshaqtaýy jaıynda aıtqan erteńgi Quryltaı keńesin qurý, úlkenge izet, tájirıbesi mol estıarlardan sabaq alý sıaqty qoǵamda bolatyn jańalyqtar da kóńilimizden shyqty.
Keshegi júregimizdi jaralaǵan qańtar qyrǵyny týraly onyń da kóp nársesiniń betin ashyp, áli de tekserilip jatqanyn aıtty. Bul bizdiń tarıhymyzǵa, bizdiń egemendigimizge, eldigimizge úlken syn bolǵan qateliktiń núktesi tezirek qoıylsa dep halyq áli de kútýde. Sondyqtan bul saýaldardyń da naqty sheshimi durys bolatynyna biz senemiz.
Taǵy bir qýanǵanymyz, keń baıtaq Qazaqstannyń oblystaryn qysqartyp emes, keńeıtip basqarý qajet edi. Jańadan qurylǵan Abaı, Ulytaý, Almaty oblysy men Qonaevtyń esimin Qapshaǵaı qalasyna berý týraly aıtqany, osynaý el ardaqtaǵan azamattyń eskerilýi bul da bir keıingige úlken úlgi bolarlyq jaıt. Óıtkeni, Qonaev týǵan elge qyzmet etýdiń, tazalyqtyń, parasattylyqtyń, azamattyqtyń úlgisin kórsetkenin biz jaqsy bilemiz. Sonyń kýágerimiz. Álemde bolyp jatqan jaıttardy túsindire kele, ekonomıkalyq qıyndyqtarǵa shydaý kerek ekenin de eskertti. Óıtkeni, týǵan elin súıetin ár azamat ózinen bastaý kerek, týǵan eldi qorǵaýǵa ózi qyzmet etýi kerek degeni de kókeıimizge qonady.
Ulttyń sanasynyń bıik bolýyn, eldiń tutastyǵy, erkindik pen kók Týdy saqtaýda birlik qajet ekenin basa aıtty. Bul da bizdiń kókeıimizde júrgen úlken másele. Bizge búgin birlik kerek, tirlik kerek! Eńbek etý kerek jáne urpaqtyń tárbıesi men saýaty kerek. Uly dalanyń birinshi baılyǵy – keńdigi jáne egisi men mal sharýashylyǵy. Mal sharýashylyǵynyń kenjelep turǵanyn taǵy da bir aıtatyn shyǵar, anaý Arqalyq pen Torǵaıdyń da taǵdyry oılandyratyn shyǵar, bári óz kezegimen bolatyn shyǵar dep oılap otyrmyn.
Bizge keń dalaǵa eńbek etetin jastarǵa múmkindik jasasa, bári durys bolar edi. Ásirese, aýyl sharýashylyǵyn, dalany kórkeıtýdi tezirek qolǵa alsa, bálkim, Qazaqstannyń bolashaǵy múldem basqa bolady, jumys qoly kóbeıedi. Meniń oıymsha, aýyldy kórkeıtý – kezek kúttirmeıtin másele. Aýyl azyp ketti. Aýyl tozǵan soń, urpaq azyp ketti. Bul da bir bizdiń kókeıimizde júrgen úlken másele. Kelesi kezekte Prezıdentimiz osyǵan kóńil bóletin shyǵar degen úmittemin.