Bazardaǵy kóterme baǵa da «ushyp» tur
Ótken aptada aqtóbelikter saýda jelilerinen qant tappaı, biraz dúrlikti. Qazir jaǵdaı birqalypty. Alaıda qant baǵasy qymbattap barady, dep habarlaıdy Almaty-akshamy.kz Baq.kz-ke silteme jasap.
Máselen, búginde oblys ortalyǵynda halyq kóp baratyn «Anvar», «Dına» saýda jelilerinde bir keli qanttyń baǵasy — 441 teńge. Al eski qalada ornalasqan Ortalyq bazarda — 550-600 teńge. Tipti, bazardaǵy kóterme baǵa da «ushyp» tur.
«Qazir jaz aıynda jurttyń kóbi qantty kóp mólsherde jumsaıdy. Sebebi tosap jabady, tátti nan pisiredi. Jyl saıyn dál osy kezeńde qanttyń baǵasy azdap kóteriledi. Halyq ta ony biledi. Alaıda bir keli qanttyń baǵasy 500 teńge boldy degen ne sumdyq? Sonda bala-shaǵasy kóp, bir jalaqyǵa kún kóretin otbasylar aqshasyn qalaı jetkizedi. Tipti, qazir un da, kúnbaǵys maıy da, jemis-jıdek te qymbattap ketti. Al endi qanttyń osynsha qymbattaǵany bizge úlken salmaq. Taǵam pisirseń de, botqa pisirseń de, qant kerek. Tıisti organdar nege baǵany júgendemeıdi? Halyqtyń jaǵdaıyn kim oılaıdy?», — deıdi Aqtóbe qalasynyń turǵyny Tilekshi Aıanbergenqyzy.
Ol otbasynda 6-7 adam turatynyn, joldasynyń tapqan aqshasy azyq-túlik pen nesıeden artylmaıtynyn aıtady. Apta saıyn kelip, «Anvar» gıpermarketinen azyq-túlik alady eken.
«Ótken aptanyń aıaǵynda kelip, osy jerden qant tappadyq. «Qoımada bitip qaldy» dep jubatty bizdi saýda jelisiniń adamdary. Búgin kelip, alyp jatyrmyn. Onda da 3 keliden artyq alýǵa bolmaıdy. Kóktemnen beri osylaı shekteý qoıylǵan», — deıdi ol.
Aqtóbe oblystyq kásipkerlik basqarmasynyń basshysy Nurhan Tileýmuratovtyń aıtýynsha, búginde oblysta qant tapshylyǵy joq. Apta basynda oblysqa 5 vagon qant ákelingen. Ár vagondaǵy qanttyń mólsheri — 68 tonna.
«Aqtóbede qant qory jetkilikti. Qazir turaqtandyrý qorynda da qant qory bar. Áleýmettik dúkenderde 363 teńgeden, al saýda jelilerinde 441-442 teńgeden satylyp jatyr», — deıdi ol.
Aqtóbe oblysynda shalǵaı aýyldarda qazir qant baǵasy 650 teńgeden satylyp jatyr. Máselen, shalǵaı aýdan — Yrǵyz aýdanynda bir keli qanttyń baǵasy — 560-620 teńge. Jaýapty mamandar kásipkerlerge eshqandaı «tártip» júrgize almaıtynyn aıtady. Eń bastysy, «Saýda qyzmetin retteý týraly» zańǵa sáıkes, ishki saýda sýbektileri áleýmettik mańyzy bar taýar túrlerine qosylatyn saýda ústemesin 15 paıyzdan asyrmaýy kerek. Alaıda kásipkerlerdiń qantty qandaı baǵaǵa alyp jatqany belgisiz.
Aıta ketý kerek, osydan bir jarym aı buryn Aqtóbede qant baǵasy 369 teńgeden 423 teńgege kóterildi. Al qańtar aıynda bir keli qanttyń baǵasy 311 teńgege satylǵan.