Sharaǵa 19 kýrsant qatysty.
Qorǵanys mınıstrligi Áskerı-tehnıkalyq mektebi Almaty fılıalynyń ujymy «Ómir súrýge úmit syıla» aksıasyn uıymdastyryp, oqý ornynyń tárbıelenýshileri aýyr syrqat balalarǵa óz erikterimen qan tapsyrdy, dep habarlaıdy Almaty-akshamy.kz.
Aksıaǵa 19 kýrsant qatysyp, medısınalyq tekserýden ótkennen keıin 7 500 mıllılıtrden astam qan tapsyrdy.
«Donor bolý – azamattyq paryzym. Onyń tipti densaýlyqqa da paıdasy zor. Densaýlyǵym jaqsy, salaýatty ómir saltyn ustanamyn. Durys tamaqtanýǵa tyrysamyn. Eger men tapsyrǵan qan bireýdiń ómirin aman alyp qalýǵa jarasa, men oǵan shyn júrekten qýanamyn», – dedi mektep kýrsanty Jarymhan Dastan.
Uıymnyń qaıyrymdylyq qyzmetiniń maqsaty – úzdik dástúrlerdi, urpaqtar sabaqtastyǵyn saqtaý jáne damytý, óskeleń urpaqty patrıotızm men Otandy súıýge tárbıeleý, adamgershilik pen meıirimdilikke baýlý.
Osyndaı ıgi ister áskerı-tehnıkalyq mekteptiń dástúrine aınaldy. Donorlyq qan tapsyrýǵa júıeli qatysýdan basqa mektep tárbıelenýshileri ardagerlerge qamqorlyq jasaý jáne áskerge shaqyrylýǵa deıingi jastarmen kezdesýler ótkizip turady. Tárbıelenýshilerdiń bastamasy boıynsha oqý jylynyń basynda tirek-qımyl apparaty buzylǵan balalarǵa arnalǵan mektep-ınternat oqýshylaryna kómek kórsetildi, sondaı-aq oqý ornynyń aýmaǵy abattandyryldy. Bul aksıaǵa áskerı-tehnıkalyq mekteptiń 30-dan astam kýrsanty qatysty.