Qoǵamda zań ústemdigi berik ornyǵyp, sot tóreligi ádil atqarylýy qajet - Prezıdent
Bul týraly Memleket basshysy óziniń Qazaqstan halqyna arnaǵan kezekti Joldaýynda aıtty, dep habarlaıdy Almaty-akshamy.kz.
«Osyǵan oraı, qazylar qaýymyn shuǵyl túrde qaıta iriktep, jańartyp jasaqtaý kerek.
Qazylar joǵary bilikti, adal, sondaı-aq, jemqorlyqtan taza bolýy qajet. Eń aldymen, barlyq sýdıalardyń mártebesin teńestirgen jón. Olar ózinen joǵary turǵan áriptesterine táýeldi bolmaýy kerek.
Kóptegen sot tóraǵasy laýazymy sýdıa laýazymy bolyp ózgeredi. Sot tóraǵasy jáne Sot alqasynyń tóraǵasy laýazymyna úmitkerdi sýdıalar ózderi saılaıtyn tásil engizýdi usynamyn.
Joǵarǵy Sot sýdıalaryn da saılaý arqyly tańdaý tásilin engizgen jón. Ol úshin Prezıdent úmitkerlerdi balamaly negizde Senatqa usynýy kerek.
Atalǵan salaǵa myqty zańgerlerdi tartý úshin materıaldyq jaǵdaı jasaý qajet», - dedi QR Prezıdenti Qasym-Jomart Toqaev.