Almaty qalasy óńirlik komýnıkasıalar qyzmetiniń alańynda Memlekettik kirister departamenti basshylarynyń qatysýymen baspasóz konferensıasy ótti. Brıfıń barysynda jańa Salyq kodeksindegi negizgi ózgerister talqylandy. Basty jańalyqtardyń biri – eseptilikti ýaqytyly tapsyrmaǵan jaǵdaıda deklarasıa avtomatty túrde nóldik kórsetkishtermen jabylýy, salyqtyq rejımder boıynsha izdeý júıesiniń engizilýi, QQS esepteý men ótem tártibiniń ózgerýi, sondaı-aq salyq tóleýshilerge servıstik súıemeldeý qyzmetiniń damýy. Bul sharalardyń barlyǵy salyqtyq ákimshilendirýdi jeńildetýge jáne esep berý kezinde qatelikterdi azaıtýǵa baǵyttalǵan.
Almaty qalasy boıynsha MKD-niń jeke kásipkerler men jeke tulǵalardy ákimshilendirý basqarmasynyń basshysy Nýrlybek Ýspanovtyń aıtýynsha, jalpyǵa birdeı belgilengen jáne arnaıy salyq rejımderiniń basty aıyrmashylyǵy salyq salý tásili men shyǵyndardy esepke alý tártibinde jatyr.
"Jalpyǵa birdeı belgilengen rejım boıynsha kásipker óz shyǵyndaryn eseptep, tek salyq salynatyn tabysynan ǵana salyq tóleıdi. Al ońaılatylǵan rejımde salyq jalpy tabystan esepteledi", – dedi ol.
Qosylǵan qun salyǵyn esepteý men ótem tártibine de ózgerister engizildi. Tikeleı salyqtardy ákimshilendirý basqarmasynyń basshysy Daryn Ibrahımniń aıtýynsha, salyq mólsherlemesi shot-faktýranyń jazylǵan ýaqytyna baılanysty bolady.
"Eger shot-faktýra 2025 jyly jazylsa, mólsherleme 12% quraıdy, al 2026 jyldan bastap – 16%. QQS ótemge alý sol operasıa jasalǵan kúngi mólsherleme boıynsha júrgiziledi. Sonymen qatar, 2026 jyldan bastap biryńǵaı ótem alý kúni engiziledi – bul taýar, jumys nemese qyzmet alynǵan kún bolyp sanalady", – dep atap ótti Daryn Ibrahım.
Jańa erejelerge kóshý prosesin jeńildetý maqsatynda MKD keńes berý qyzmetin keńeıtýdi josparlap otyr.
"Salyq kodeksinde "servıstik top" uǵymy engizildi. Endi salyq tóleýshiler tirkeýden bastap, qyzmetin toqtatqanǵa deıin keńes berý, túsindirý jáne eseptilikti toltyrý kezinde kómek kórsetý túrindegi jan-jaqty qoldaý alady ", – dedi Memlekettik qyzmetter basqarmasynyń basshysy Baqytgúl Seıtova.
MKD Almatynyń túsindirý jumystary jáne baılanys ortalyǵy basqarmasynyń basshysy Aıjan Bekeeva salyq tóleýshilerge yńǵaıly bolý úshin keńes alý joldarynyń kóbeıgenin atap ótti.
"Barlyq memlekettik kirister basqarmalarynda keńes berý ortalyqtary jumys isteıdi. Sonymen qatar biz áleýmettik jeliler arqyly da belsendi baılanystamyz, tikeleı efırler ótkizip, azamattardyń suraqtaryna jaýap beremiz", – dedi ol.
Jaqyn ýaqytta Memlekettik kirister komıtetiniń saıtynda salyq rejımderi boıynsha izdeý júıesi iske qosylady. Bul qural kásipkerlerge óz seriktesterin tekserip, olardy shegerimge qospas buryn senimdi bolýǵa múmkindik beredi.
"Mundaı servıs qazirgi tańda QQS tóleýshiler boıynsha jumys isteıdi, endi onyń analogy salyq rejımderi úshin de paıda bolady", – dedi Baqytgúl Seıtova.
Salyq eseptiligi de jańartylmaq. Eger salyq tóleýshi deklarasıany ýaqytynda tapsyrmasa, júıe avtomatty túrde nóldik kórsetkishtermen esepti qalyptastyrady. Bul rette merziminen kesh tapsyrǵany úshin ákimshilik jaýapkershilik alynyp tastalady.
"Eger esep keıinirek qaǵaz túrinde – poshta nemese HQKO arqyly tapsyrylsa, júıe nóldik deklarasıany jańasymen almastyrady. Alaıda bir jyl boıy esep tapsyrmaǵan tulǵalar „belsendi emes salyq tóleýshiler“ mártebesinde qalady", – dep túsindirdi Baqytgúl Seıtova.
Sondaı-aq kólik, jer jáne múlik salyǵy boıynsha avanstyq jáne aǵymdaǵy tólemderdi esepteý alynyp tastalady. Al aksız jáne habarlama negizindegi qosymsha esep túrleri jańa "habarlama boıynsha salyq eseptiligi" formasymen biriktiriledi.
Sonymen qatar salyq tóleýshilerge ózderiniń qyzmet túrlerin rastaıtyn OKED kodtaryn tekserip, jańartýǵa keńes berildi.
"Mysaly, keıbir shaǵyn dúkender óz qyzmetin durys emes kodpen – larek nemese kıosk saýdasy retinde kórsetip júr. Mundaı sáıkessizdikterdi boldyrmaý úshin kásipkerlerge „eLicense“ portaly nemese HQKO arqyly QEDK (OKED)-terin ózektendirýdi usynamyz", – dedi Baqytgúl Seıtova.
Almaty qalasy boıynsha Memlekettik kirister departamentiniń ókilderi jańa sıfrlyq servıster men eseptilikti avtomattandyrý júıesi salyq salý úderisin aıqyn, yńǵaıly jáne barlyq salyq tóleýshiler úshin túsinikti etetinine senimdi.