Almaty qalasy TJD turǵyndardy jylytý maýsymynda órt qaýipsizdigi erejelerin saqtaýǵa shaqyrady
Almaty qalasy Tótenshe jaǵdaılar departamenti jylytý maýsymy kezeńinde qala turǵyndarynyń órt qaýipsizdigin qamtamasyz etý maqsatynda keshendi sharalar qabyldaýda. Bul týraly aqparat Óńirlik komýnıkasıalar qyzmetiniń alańynda belgili boldy.
TJD Memlekettik órt baqylaý basqarmasy bastyǵynyń orynbasary Erkebulan Jumataevtyń aıtýynsha, 8 qazanda bastalǵan jylytý maýsymymen qatar qalada órttiń aldyn alý jáne turǵyndar úshin táýekelderdi azaıtý baǵytynda belsendi profılaktıkalyq jumys júrgizilýde.
«Oqıǵalardyń sanyn azaıtý maqsatynda turǵyn úılerdegi órt qaýipsizdigi boıynsha profılaktıkalyq jumystardy júzege asyrýdyń biryńǵaı jospary ázirlengen. Qazirgi tańda TJD esebinde 151 myńnan astam jeke turǵyn úı bar. Onyń ishinde qatty otynmen jylytylady dep esepke alynǵan 1 450 úı jáne qańqaly-qamysty eski úlgidegi 5 605 úı erekshe baqylaýǵa alynǵan», – dedi Erkebulan Jumataev.
15 tamyzdan bastap TJD tarapynan keń aýqymdy órtke qarsy aqparattyq-túsindirý naýqany júrgizilýde. Ásirese áleýmettik jaǵynan osal otbasylarǵa erekshe nazar aýdarylýda – olardyń 689 úıi men áleýmettik turǵydan beıimdelmegen ómir saltyn ustanatyn 4 myńnan astam adamnyń úıleri profılaktıkalyq tekserýmen qamtylǵan.
«2018 jyldan beri qala jáne aýdan ákimdikteriniń qoldaýymen jeke turǵyn úılerge 1 453 kómirtek totyǵynyń dachıkteri ornatyldy. Tek bıylǵy maýsymda qosymsha 642 dachık satyp alyndy. Bul qurylǵylar kómirqyshqyl gazymen ýlanýdyń aldyn alýǵa kómektesedi», – dep atap ótti spıker.
25 qyrkúıekten bastap megapolıste órt qaýipsizdigi aılyǵy uıymdastyryldy. Onyń aıasynda jeke turǵyn úıler men kóppáterli úılerdiń turǵyndarymen kezdesýler, túsindirý jumystary júrgizilip, órt qaýipsizdigi talaptary boıynsha jadynamalar men býkletter taratylýda.
Halyqty keńinen qamtý úshin zamanaýı tehnologıalar qoldanylýda:
* nusqaýlyqtar men usynystarǵa qol jetkizýge arnalǵan QR-kodtar ázirlendi;
* LED-ekrandarda oqytý beınerolıkteri kórsetilýde;
* 7,6 mıllıonnan astam abonentti qamtyǵan SMS-habarlamalar jiberildi.
Jylytý maýsymyna daıyndyq bastalǵaly beri tele jáne radıo sújetterdi, baspa jáne onlaın basylymdardy qamtıtyn 1 168 aqparattyq materıal ázirlendi.
Sóz sońynda TJD mamandary turǵyndardy órt qaýipsizdiginiń qarapaıym erejelerin saqtaýǵa shaqyrdy:
* Jylytý maýsymynda tútin murjalaryn ár eki aı saıyn kúıeden tazalańyz;
* Peshti shamadan tys qyzdyrmańyz jáne oǵan jaqyn janǵysh zattardy qoımańyz;
* Gazben jylytý peshterin paıdalaný nusqaýlyǵyn qatań saqtańyz;
* Pesh, gaz baǵanasy, plıta, kerosın jáne elektr quraldaryn qaraýsyz qaldyrmańyz, baqylaýdy balalarǵa tapsyrmańyz;
* Pesh ústine kıim-keshek, aıaq kıim jáne basqa da janǵysh zattardy ilmeńiz;
* Sirińke men ot jaǵatyn quraldardy balalardyń qoly jetpeıtin jerde saqtańyz.