Byltyr jyl sońyna taman megapolıste Erte aralasý áleýmettik qyzmetter ortalyǵy ashylyp, jumys isteı bastaǵan bolatyn. Az ýaqyt ishinde biraz jumysty eńserip te tastady. Endi búgin sol ortalyqtyń lentasy saltanatty túrde qıyldy.
Demek tolyqqandy iske kiristi degen sóz. Kabınetteri de tolyq jaraqtalǵan. Keń ári jap-jaryq.
Almaty qalasynda erte aralasý baǵdarlamasyn iske asyrýdyń tetigi 2023 jyly ótkizilgen pılottyq jobanyń nátıjeleri men úkimettik emes uıymdardyń, atap aıtqanda «Keńes», «ARDI» jáne «Dara» qoǵamdyq qorlarynyń qundy tájirıbesine negizdelgen.
Iá, shaharda balalar ortalyǵy, ońaltý ortalyqtary az emes. Degenmen Almaty qalasy Jumyspen qamtý jáne áleýmettik baǵdarlamalar basqarmasyna qaraıtyn biz aıtyp otyrǵan ortalyq bárinen ózgeshe desek qatelespeımiz. Biregeıligi sol – Almaty qalasynyń ákimi bekitken reglament negizinde densaýlyq saqtaý, bilim berý jáne áleýmettik qorǵaý basqarmalary úshtik odaq retinde ózara tyǵyz baılanysta jumys isteýdi kózdep otyr. Iaǵnı osy úsh vedomostvo ókilderi erteńgi kúni kesh bolyp qalmaý, múgedektiktiń aldyn alý úshin, kishkentaı baldyrǵandardyń ómiriniń eń mańyzdy degen osynaý damý kezeńinde fızıkalyq, kognıtıvti, emosıonaldy jáne áleýmettik jaǵynan kásibı qyzmetterdi birlesip kórsetýge nıetti.
«Ortalyqtyń ashylýy – erterek, der shaǵynda kómek kórsetilýi tıis balalary bar otbasylarǵa áleýmettik qoldaýdy damytýdaǵy mańyzdy qadam. Biz birlesken kúsh-jigermen árbir balanyń laıyqty bolashaǵyn qamtamasyz ete alatynymyzǵa senimdimiz», – dedi saltanatty jıynda sóz sóılegen Almaty qalasy Máslıhatynyń tóraǵasy Meıirjan Otynshıev.
Búginde atalǵan ortalyqqa damýynda kesheýildeý baıqalǵan, aýtızm, ZPR dıagnozy qoıylǵan 130 bala kelip júr. Órenderdiń ıgiligi úshin logoped, pedıatr, fızıoterapevt, psıholog, arnaıy pedagog, áleýmettik qyzmetkerlerden quralǵan, 30 adamnan turatyn úılesimdi top jumys isteıdi. Bul – úlken kúsh.
«Ulymnyń qatarlastaryna qaraǵanda ózgesheleý ekenin bir aı buryn ǵana baıqadyq. Dereý dabyl qaqtyq. Tirkelgen emhanamyzdyń dárigeri osy ortalyq týraly aıtty. Munda kelgenimizge eki-aq kún boldy. Degenmen, ortalyqtaǵy jyly aýra, bárine júregin alyp júgirýge daıyn jyly júzdi mamandar meni birden baýrap aldy. «Búgin qalaı uıyqtap turdyńyzdar?», – dep jaı ǵana amandyq-saýlyq surasýynyń ózi boıyńa qýat beredi. Munda balany damytýǵa degen yqylasy joǵary myqty mamandar jasaqtalǵan desem, qatelespeımin. Almaty ákimdigine rahmet, bizge osyndaı tegin ortalyq ashyp bergen! Biz sekildi ata-analarǵa demeý bolý mıısıasyn da qosa atqaryp júrgen jandarǵa alǵystan basqa aıtarym joq», – deıdi eki jasqa taıap qalǵan Iasınniń anasy Araılym.
Ortalyqtyń ashylý saltanatynda syılyqqa kenelgen balalardyń da qýanyshynda shek joq. Úlken-kishi birge qýanyp júr desek te artyq aıtqandyq emes.
«Ortalyqqa tórttegi Ámınamdy ákelip júrmin. Jıenim ǵoı. Áke-sheshesi jumysta, sondyqtan olarǵa qoldaý kórsetip, tireý bolǵym keledi. Ámınama qarap keıde muńaıyp ta qalatyn sátterim bolady. Áli sóılemeıdi. Qatty, oqys daýystardan shoshyp, jylap jiberedi. Buryn óte mazasyz bolatyn. Qazir osy ortalyqtan AVA terapıasyn alyp júrmiz. Nátıje bar. Ámınamnyń kishkentaı jetistiginde osy ortalyqtyń árbir qyzmetkeriniń úlesi bar dep sanaımyn. Aıtpaqshy, bizge aldaǵy ýaqytta taksımen júrý tegin bolady eken. Biraq balapanymdy qazirden ádeıi qoǵamdyq kólikpen alyp júremin. Sebebi, oǵan adamdarmen jandy qarym-qatynas hám aınalasyndaǵy qubylystardy sezinýi kerek dep oılaımyn. Eki jarym jasynan osylaı jetektep kelemin. Ol úshin sharshamaımyn», – deıdi zeınetker Zıagúl Muqashqyzy.