Almaty ákimi Darhan Satybaldy tóraǵalyǵymen qalanyń syrtqy jáne sáýlettik jaryqtandyrý júıesin jańǵyrtý jóninde keńes ótti. 2025 jyldyń qorytyndysy qaralyp, mindetter aıqyndaldy.
2025 jyly jaryqtandyrýdy jańǵyrtý jumystary 18 ýchaskede júrgizildi, onyń 12-si aıaqtaldy. Barlyǵy 10,5 myńnan astam jańa sham ornatyldy, 4,2 myńnan astam qoldanystaǵy sham aýystyryldy jáne 4,1 myń torsher shamdary ornatyldy. Bul magıstraldardyń, turǵyn aýdandardaǵy kóshelerdiń jáne júrginshiler aımaqtarynyń jaryq deńgeıin edáýir arttyrýǵa múmkindik berdi.
Buryn jaryqtandyrylmaǵan aýmaqtarǵa erekshe nazar aýdarylady. Baǵdarlama aıasynda qosymsha 301 ýchaske jaryqpen qamtamasyz etilip, 2086 jaryq núktesi ornatyldy. Birqatar aýdanda jumys tolyǵymen aıaqtaldy, qalǵandary bitýge jaqyn.
Jıynda baǵdarlamany iske asyrýda "Almaty Qala Jaryq" MKK jáne aýdan ákimdikteri erekshe ról atqaratyny atap ótildi. Ǵımarattardy sáýlettik jaryqtandyrý mańyzdy baǵyt bolyp tabylady: bıyl qalanyń 100 áleýmettik ınfraqurylym nysany men iri sáýlet qurylysyn jaryqtandyrý tolyǵymen bitti.
2026 jyldyń sońyna deıin jalpy uzyndyǵy 339 km 80-nen astam kóshede syrtqy jaryqtandyrý jelilerin jańǵyrtý jáne qosymsha 11 300 sham ornatý josparlanǵan. Sondaı-aq, júrginshiler aımaqtaryn jaryqtandyrý jumystary jalǵasady - 88,5 shaqyrym trotýarǵa 1500-den astam torsher shamy men 1000 kronshteın josparlanǵan.
Darhan Satybaldy jumystardy merziminde oryndaý, montajdaý sapasyn arttyrý jáne júıeli baqylaý qajettigin atap ótti.
"Turǵyndardyń qaýipsizdigi men jaılylyǵyna basymdyq beriledi. Jaryqtandyrýdy jańartý qalalyq ortanyń sapasyna tikeleı áser etedi. Belgilengen kesteni qatań saqtaý, merdigerlerge baqylaýdy kúsheıtý jáne qazirgi máselelerdi jedel sheshý qajet", - dedi ákim.
Sondaı-aq, sáýlettik jaryqtandyrý baǵdarlamasyn keńeıtý, bilim berý mekemelerine, emhanaǵa, aýlaǵa, mádenı oshaqtarǵa nazar aýdarý tapsyryldy.