Búginde qurylys salasynda 100 myńnan astam adam jumys isteıdi
Almatyda Qurylysshylar kúnine arnalǵan saltanatty shara ótti. Qala ákimi Erbolat Dosaev qurylys salasynyń ókilderin kásibı merekelerimen quttyqtady, dep habarlaıdy Almaty-akshamy.kz.
Almaty ákimi quttyqtaý sózinde qurylys salasy qala ekonomıkasynyń negizgi draıverleriniń biri ekenin atap ótti. Búginde qurylys salasynda 100 myńnan astam adam jumys isteıdi. Jyl saıyn qalada orta eseppen 1,5 mln sharshy metrden astam turǵyn úı paıdalanýǵa beriledi, áleýmettik jáne ónerkásiptik nysandar salynýda.
«Sizderdiń jumystaryńyz búkil qalanyń keshendi jáne sapaly damýy úshin óte mańyzdy. Bizdiń turǵyndardyń ómir súrý sapasy men jaılylyǵy jumystyń nátıjelerine tikeleı baılanysty», – dedi qala ákimi Erbolat Dosaev.
Saltanatty shara barysynda qala ákimi qurylys salasy ókilderiniń joǵary kásibıligine alǵysyn bildirip, kóp jylǵy eńbegi men eren jetistikteri úshin olardy Alǵys hattarmen marapattady. Merekelik shara qurylysshylar arasyndaǵy spartakıadaǵa ulasty.
