Almaty qalasy ákimdiginde qala basshysy Darhan Satybaldynyń tóraǵalyǵymen "Taza Qazaqstan" ekologıalyq baǵdarlamasynyń júzege asyrý barysyna arnalǵan jıyn ótti.
Darhan Satybaldy sanıtarlyq tazalyq pen ekologıalyq mádenıetti damytý qalanyń basty basymdyqtarynyń biri ekenin atady. Onyń aıtýynsha, bul baǵyttaǵy jumys júıeli túrde júrgizilýge tıis. Ákim ásirese turǵyndardyń bastamasyn, jastar qozǵalystaryn qoldaý men ekologıalyq belsendilikti keńinen nasıhattaýdyń mańyzyna toqtaldy.
18-25 qazan aralyǵynda Almatynyń barlyq segiz aýdanynda senbilik ótti. İs-sharaǵa memlekettik organdardyń, komýnaldyq qyzmetterdiń, bıznes qurylymdarynyń ókilderi men belsendi azamattar atsalysty. Barlyǵy 8 myńnan astam adam jáne 561 arnaıy tehnıka jumyldyrylyp, 9 myń tekshe metrden asa qoqys shyǵaryldy. Sonymen qatar 2,5 myńnan astam aǵash – úıeńki, qaraǵaı, shegirshin men qaraǵan kóshetteri egildi.
Osy aptada "Aıýsaı" vızıt-ortalyǵy aýmaǵynda prokýratýra jáne ulttyq park ókilderi senbilik ótkizedi.
"Jasyl aýla" jobasynyń kúzgi kezeńinde kópqabatty úılerdiń turǵyndaryna 528 kóshet – 409 aǵash pen 119 buta taratyldy.
"Jasyl el" jastar eńbek jasaqtarynyń maýsymdyq jumysy qorytyndylanyp, Almaty shtaby respýblıka boıynsha úzdik dep tanyldy. Eń belsendi 20 múshesine syılyqtar berildi. Sondaı-aq, qalada ótken Plastic Hunt aksıasy barysynda 25 keli plasık qaldyq jınaldy. Kelesi is-shara qarasha aıynyń sońynda ótedi.
Jıyn barysynda ákim turǵyndardyń ótinishine der kezinde, sapaly ári naqty jaýap berýdi, formaldy tásilge jol bermeýdi tapsyrdy.
Darhan Satybaldy almatylyqtardy týǵan qalasynyń tazalyǵyn saqtaýǵa belsene atsalysýǵa shaqyryp, kóshe men aýla, sondaı-aq qoǵamdyq orynnyń sanıtarlyq ahýalyna baqylaýdy kúsheıtýdi tapsyrdy.