Almatynyń Azamattyq avıasıa akademıasynda Stýdentter úıi – 482 oryndyq zamanaýı ǵımarat ashyldy. Bul týraly qalalyq Jastar saıasaty basqarmasynyń ókilderi habarlady.
Basqarmanyń málimetinshe, Kólik mınıstrliginiń, QR Ǵylym jáne joǵary bilim mınıstrliginiń jáne Almaty ákimdiginiń qoldaýymen 2024 jyly "Qazaeronavıgasıa" RMK balansynan kólemi 7 myń sharshy metrden asatyn ákimshilik-qonaq úı keshenin akademıanyń menshigine berý týraly sheshim qabyldanǵan bolatyn. Sonyń arqasynda ǵımarat jańartylyp, zamanaýı Stýdentter úıin qurýǵa múmkindik berildi. Nysan stýdenttik jataqhanalar salý boıynsha jobalyq keńseniń jumysy aıasynda júzege asyryldy.
Jańa korpýs Azamattyq avıasıa akademıasy men Almaty halyqaralyq áýejaıynyń janynda ornalasqan. Ǵımarat 482 orynǵa arnalǵan, jaıly, qaýipsiz ári energıa tıimdiliginiń zamanaýı standarttaryna saı.
Jataqhana seksıalyq formatta salynǵan. Ár seksıa eki bólmeli, munda dýsh jáne jýynatyn bólme de qarastyrylǵan. Ár qabatta as úı, sondaı-aq oqýǵa arnalǵan kovorkıng keńistikter bar.
Stýdentter úıinde sport zaldary, demalys aımaqtary, medısınalyq kabınet jáne abattandyrylǵan alańdar bar. Jataqhana akademıa stýdentteriniń ómirin jandandyryp, ózara pikirlesý men shabyt ortalyǵyna aınalady.
"Bul jobanyń ereksheligi, ol joǵary oqý oryndaryna arnalǵan ǵımarattardy qaıta jańartý tetigi boıynsha iske asyryldy. Sonyń arqasynda ǵımarat jańardy ári barlyq zamanaýı talapqa saı jańa stýdenttik ortalyqqa aınaldy", - dedi Almaty qalasy Jastar saıasaty basqarmasynyń basshysy Azız Qajdenbek.