Almatyda túrki áleminiń eń kóńildi ári tapqyr jastary bas qosqan "TurkiCUP" atty halyqaralyq jaıdarman oıyny ótti, - dep habarlaıdy Aqshamnews.kz tilshisi.
Bıyl Almaty qalasy túrki áleminiń jastar astanasy mártebesine ıe boldy. Kóńildi tapqyrlar keshine Qyrǵyzstan, Ózbekstan, Túrkıa jáne Qazaqstannyń túkpir-túkpirinen kelgen 11 komanda qatysty.
"Jaıdarmanǵa" bizdi Esen aǵa shaqyrdy. Ol "TurkiCUP" oıynyna túrki áleminiń komandalary qatysady dedi. Ózbekstan, Qyrǵyzstan, Qazaqstan, Ázerbaıjan elderinen qatysady. Biz Túrkıa quramasy retinde keldik. Jaqsy oıyn kórsetemiz dep oılaımyz", – dedi Túrkıa quramasynyń oıynshysy Sedat Chıchek.
Qazylar alqasynda sport pen mádenıet ókilderi, sondaı-aq tanymal blogerler boldy.
"Bul oıynnyń bizge bereri, eń aldymen, túrki tildes memleketter - baýyrlas elder. Tilimiz de uqsas, dástúrimiz de ortaq. Bul tájirıbe almasýdyń tamasha alańy dep oılaımyn. Ózge elderdiń belsendi, jalyndy jastary bar. Sondyqtan mundaı shyǵarmashylyq baılanystardyń keńeıýi tek ósý men damýǵa yqpal etedi. Sol sebepti mundaı sharalar jıi ótken saıyn jaqsy nátıjeler kútýge bolady", – dedi "Jaıdarman" oıyndarynyń qalalyq fılıalynyń dırektory Ońdasyn Qulymbetov.
"Qala ákimi Darhan Amangeldiuly jastardyń jaǵdaıyn jaqsartý, olardyń áleýetin arttyrý máselesin árdaıym basty nazarda ustaıdy. Búgingi is-shara – sol turaqty qoldaýdyń aıqyn kórinisi dep aıtýǵa bolady", - dedi Jastar saıasaty basqarmasynyń basshysy Azız Qajdenbek.
Oıyn nátıjesinde bas júlde men 1,5 mln teńge kólemindegi syıaqyny Rýdnyı komandasy jeńip aldy. II oryn men 1 mln teńgeni qyrǵyzstandyq qos komanda qanjyǵasyna baılasa, III oryn túrkıalyq ázilkeshterge buıyrdy.