Almaly aýdanynda birqatar medısınalyq nysandarda jóndeý jumystary aıaqtalyp, jańa perzenthananyń qurylysyna daıyndyq bastaldy. Almaty qalasy Óńirlik komýnıkasıalar qyzmetinde aýdan ákimi Arman Shamshın Densaýlyq saqtaý ınfraqurylymyn damytýdyń barysy týraly aıtty.
Qazirgi tańda aýdanda 25 medısınalyq uıym jumys isteıdi, onyń 12-si memlekettik, 13-i jeke menshik mekeme.
2025 jyly №3 qalalyq emhananyń kúrdeli jóndeý jumystary tolyq aıaqtalyp, mekeme turǵyndardy qabyldaýdy bastady. Sonymen qatar Qalalyq adam reprodýksıasy ortalyǵynyń eki korpýsy jańǵyrtyldy.
Quny 11,5 mlrd teńge bolatyn №1 qalalyq perzenthananyń qurylysy boıynsha joba daıyndalyp jatyr. Qurylys 2025 jyldyń sońyna taman bstalyp, 2026 jyldyń tórtinshi toqsanyna aıaqtalmaq. Qurylys kezeńinde ortalyqtyń bólimsheleri ýaqytsha Áleýmettik qorǵaý salasyndaǵy baqylaý komıteti departamentiniń ǵımaratynda ornalastyrylady.
Sonymen qatar, qalalyq balalardy ońaltý ortalyǵyn qurý jobasy júzege asyryla bastady. Tehnıkalyq tekserýden keıin joba qosymsha memlekettik saraptamadan ótip, túzetilip jatyr.
«Jańartylǵan parametrlerge sáıkes jobalyq-smetalyq qujattama naqtylanýda. Bul joba balalarǵa jańa ári arnaıy jabdyqtalǵan jaǵdaıda ońaltý qyzmetterin alýǵa múmkindik beredi», – dep atap ótti Arman Shamshın.
Aýdanda Raıymbek dańǵyly boıynda erekshe qajettilikteri bar adamdarǵa arnalǵan sporttyq-ońaltý ortalyǵynyń qurylysy da júrgizilip jatyr. Nysandy 2026 jyldyń qarashasynda paıdalanýǵa berý josparlanǵan. Ortalyq fızıkalyq qalpyna keltirý, beıimdelgen sport jáne saýyqtyrý baǵdarlamalaryna arnalǵan kópfýnksıaly alańǵa aınalmaq.
Negizgi jobalardyń biri – Áıteke bı men Masanchı kósheleriniń qıylysynda ornalasqan táýligine 500 adam qabyldaıtyn jańa qalalyq emhana qurylysy. Joba 2025 jylǵy 14 sáýirde saraptamanyń oń qorytyndysyn aldy. Qazirgi ýaqytta nysanda buzý jumystary aıaqtalyp, qurylys-montaj jumystary 2025 jylǵy qarasha aıynda bastalady. Emhanany 2026 jyldyń tórtinshi toqsanynda paıdalanýǵa berý josparlanǵan.
Aýdan ákimdigi turǵyndarǵa qoljetimdi ári sapaly medısınalyq qyzmet kórsetý úshin ınfraqurylymdyq jobalardy dáıekti túrde júzege asyrýdy jalǵastyryp keledi.