2025 jyldyń on aıynda Almaly aýdanynda ınjenerlik jáne kólik ınfraqurylymyn jańartý baǵytynda aýqymdy jumystar atqaryldy. Jylý, sý jáne káriz jelisi jóndelip, jol men trotýar jańartylyp, myńdaǵan jańa sham ornatyldy. Bul qala turǵyndarǵa jaıly jaǵdaı jasap, qaýipsizdikti artyrýǵa baǵyttalǵan. Óńirlik komýnıkasıalar qyzmeti alańynda Almaly aýdany ákimi Arman Shamshın osylaı dep málimdedi.
Aýdan ákimdiginiń derekteri boıynsha, qazirgi ýaqytta jylý jelileriniń tozý deńgeıi 62%-dan asady, aýyzsý júıeleri – shamamen 73%, káriz jelileri – 80%-ǵa jýyq, elektr jelileriniń 81% tozǵan. Osyǵan baılanysty keshendi jańalaý men jańǵyrtý baǵdarlamasy júzege asyp jatyr.
Energetıka jáne sýmen qamtý salasy boıynsha jumystar. «AlataýJaryqKompanıasy» AQ 1,2 shaqyrym elektr jelisin jańartty. «Almaty Sý» SHJQ MKK aýyzsý júıelerin 3,18 shaqyrymǵa jańǵyrtty. Káriz júıesi baǵytynda 15 kóshede 10 shaqyrym jańa jeli salynyp, «Almaty Sý» tórt jerdi jańǵyrtyp shyqty. Energetıka jáne sý sharýashylyǵy basqarmasy Muratbaev kóshesinde (Gogol kóshesinen Raıymbek dańǵylyna deıin – 1 120 m) jáne Muqanov kóshesinde (Abaı dańǵylynan Raıymbek dańǵylyna deıin – 2,5 shaqyrym) káriz júıesin sanasıalaý jumystaryn aıaqtady.
«Almaty jylý júıesi» JSHS 30 mekenjaı boıynsha uzyndyǵy 12,3 shaqyrym jylý jelilerin jańartty. Sonyń arqasynda jylýmen qamtý júıesiniń sapasy artyp, jylý energıasynyń joǵalýy azaıdy.
Jol jóndeý jáne kólik ınfraqurylymy. On aı ishinde uzyndyǵy 5,8 shaqyrym bolatyn 11 kóshede ortasha jol jóndeý jumystary júrgizildi, onyń úsheýi – magıstraldyq, segizi – aýdandyq mańyzy bar kósheler. Sondaı-aq Jeltoqsan jáne Raıymbek dańǵyldary boıynda BRT júıesin engizý boıynsha jumystar jalǵasyp jatyr.
Jóndeý jumysy aıasynda 180 mekenjaıda shuńqyrlar qalpyna keltirilip, biteldi (28 myń sharshy metr), bul josparlanǵan kólemnen 3 myń sharshy metrge artyq. 728 lúk pen 829 sý qabyldaǵysh retke keltirildi. 16 mekenjaıda trotýarlar (5,4 km) jóndelip, 14 kóshede uzyndyǵy 13,8 shaqyrym bolatyn tehnıkalyq trotýar salyndy.
Aýdandaǵy 110 kóshege sham ornatylǵan. 2025 jyly eski shamdardy aýystyrý úshin biraz jumys isteldi: 3 750 jańa shamy ornatylyp, 48,5 shaqyrym kabel jelisi tartyldy. Syrtqy jaryqtandyrý basqarý shkaftary da jańartylyp jatyr – 61 nysannyń 45-inde jumys tolyq aıaqtalǵan.
«Jaıaý júrginshiniń qaýipsizdigin arttyrý maqsatynda Nazarbaev, Abaı, Seıfýllın, Tóle bı, Jeltoqsan men Naýryzbaı batyr kóshesinde jaryqtandyrý júıesi jańartyldy. Osynyń arqasynda keshki jáne túngi ýaqytta kóshe qozǵalysy jaıly ári qaýipsiz boldy», - dedi Arman Shamshın.