Memleket basshysy Qasym–Jomart Toqaevtyń «Ádiletti memleket. Birtutas ult. Berekeli qoǵam» atty Qazaqstan halqyna Joldaýymen Seısmologıa ınstıtýtynyń ujymy da jete tanysyp, talqylaýda.
Prezıdenttiń ózi atap ótkenindeı, elimiz jańa kezeńge qadam basýda. Jańa, ádiletti qoǵam qurý jolynda birqatar ıgi sharalardy júzege asyrý qolǵa alynyp jatyr. Joldaýdyń atalýynan da aıqyn ańǵaryp turǵanymyzdaı, Ádiletti memleket. Birtutas ult. Berekeli qoǵam degenimiz qasterli ushtaǵan uǵymyn bildiredi. Iaǵnı, halqymyz ádiletti qoǵamda birtutas ult bolyp, «Bir jaǵadan bas, bir jeńnen qol shyǵara» eńbek etip ómir súrse, irgemizdiń berik bolatyny, áleýmettik-ekonomıkalyq baǵytta talaı bıik asýlar men tabystarǵa jetetinimiz sózsiz. Qazaqstanymyz gúldenip, órkendeýi úshin árkim ózine tapsyrylǵan iske joǵary jaýapkershilikpen qarap, sapaly eńbek etýimen úles qosýy qajet. Sonda ǵana eńsesi bıik el bolamyz. Halyqtyń ózara tatý-birligi berekeli qoǵamnyń berik irgetasyn qalaıdy.
Qoǵamymyzda sheshýin kútken kúrdeli máseleler az emes. Prezıdentimiz Joldaýynda alǵa basýymyzdyń bes baǵdaryn jáne ony júzege asyrýdyń joldaryn da atap kórsetti. Sonyń «Jańa ekonomıkalyq saıasat» atty birinshi baǵdarynda makroekonomıkalyq turaqtylyqty qamtamasyz etý, ekonomıkany ártaraptandyrý jáne sıfrlandyrý, sonymen qatar, shaǵyn jáne orta bıznes pen adam kapıtalyn damytý, zań ústemdigin ornatý qajet ekenin birinshi kezekte atap ótýi beker emes. Bul máseleler aldyńǵy kezekte sheshimin tapsa, damýdyń dańǵyl jolyna túsetinimiz aıqyn.
Instıtýtymyz Qazaqstan halqyn joıqyn zilzaladan saqtandyrý jáne onyń aldyn alý baǵytynda irgetasy 1976 jyly qurylǵan elimizdegi osy baǵyttaǵy biregeı mekeme. Bıyl jyl basynan bastap QR TJM-niń quzyryna óttik. Osy kúni keshe Qostanaı oblysynyń ormandy alqabyn jáne eldimekenderin sharpyǵan alapat órtti sóndirýmen alǵashqy kezekte tótenshe jaǵdaılar departamentteriniń ujymdary arpalysty. Tipti, búkil el bolyp tilsiz jaýmen kúresti. Órt orasan zor áleýmettik jáne ekonomıkalyq úlken shyǵyn ákeldi. Mamandar órtengen ormandy alqapty qalpyna keltirý úshin kem degende elý jyl qajet dep otyr. Bizder birtutas qoǵamda ómir súrip jatqandyqtan, mundaı jaǵdaıda syrt qala almaımyz. El bolyp, jurt bolyp, kezdesken qıyndyqtar men tosynnan kelgen osyndaı tosqaýyldardy jeńip otyrýmyz qajet. Birtutas ult degenimizdiń bir sheshimi osyndaı jaǵdaıda kórinis tapsa kerek. Instıtýt ujymy bir kúndik jalaqylaryn qıyndyqty bastarynan keship jatqan qostanaılyqtarǵa kómek retinde aýdarýǵa sheshim qabyldady.