Bıyl 19 naýryzda Májilis pen máslıhattar depýtattarynyń kezekten tys saılaýy ótedi. Osyǵan oraı QazAqparat tilshisi aldaǵy saıası naýqannyń ereksheligi men artyqshylyǵy týraly QR Prezıdenti janyndaǵy Qazaqstannyń strategıalyq zertteýler ınstıtýtynyń bas sarapshysy Álisher Tastenovtiń pikirin bilgen edi.
«Májilis pen máslıhattar depýtattaryn saılaý - saıası júıeni túbegeıli qaıta jandandyryp, memlekettik basqarýdyń jańa formasyna alyp keledi. Qaıta jańarý saıası jáne ekonomıkalyq syn-qaterlerge tózimdi tótep beretin saıası model qalyptastyrýǵa baǵyttalǵan. Osylaısha «kúshti Prezıdent – yqpaldy Parlament – esep beretin Úkimet» formýlasyna qol jetkiziledi. Aldaǵy saılaýdyń ereksheligi - jańa ári sapaly jaǵdaıda ótetindigi. Endi Májilis depýtattarynyń 70%–y partıalyq tizim boıynsha, 30%-y bir mandatty okrýgter arqyly saılanady», - dedi Álisher Tastenov.
Sarapshy keltirgen dáıekke sáıkes, partıalardyń Májiliske ótýiniń shekti kedergisi 7-den 5%-ǵa deıin tómendetildi. Sonymen qatar saıası partıalardy tirkeý rásimi aıtarlyqtaı jeńildetildi.
«Iaǵnı saıası partıa músheleri sanyna qoıylatyn talap jeńildep, 4 ese 20-dan 5 myń múshege deıin tómendetildi. Partıalardyń óńirlik ókildikteriniń sany da 600-den 200 adamǵa deıin qysqartyldy. Oblystar men respýblıkalyq mańyzy bar qalalardyń máslıhattar depýtattaryn saılaý aralas júıemen ótedi. Iaǵnı 50/50 formatynda. Bul rette aýdandar men oblystyq mańyzy bar qalalarda máslıhat kandıdattaryna qazaqstandyqtar bir mandatty okrýgter boıynsha daýys bere alady»,- deıdi ol.
Onyń aıtýynsha, jańa saıası jaǵdaı bılik organdarynyń qoǵam pikiri, kózqarasy men suranysyna qulaq asýdy qamtamasyz etip, azamattyq qoǵamnyń tıimdi damýyna yqpal etedi.