Қазақстанда тұрғын үйді ипотека арқылы алу үрдісі соңғы уақытта айтарлықтай өскен. Ұлттық банк мәліметтеріне сәйкес, өткен жылы Қазақстан азаматтары баспана алу үшін қаржы ұйымдарынан жалпы 6 триллион теңге көлемінде қарыз алған. Бұл көрсеткіш өткен жылмен салыстырғанда 13,5 пайызға артқанын көрсетеді. Яғни, ел тұрғындары ипотекалық несиеге көбірек жүгініп, баспана алу үшін қарыз алып жатыр, деп хабарлайды aqshamnews.kz
Елордалықтар ипотека бойынша ең көп қарыз алғандар қатарында. Олардың банк алдындағы жалпы берешегі 2 триллион теңгеге жуықтайды. Бұл көрсеткіш Алматы мен Шымкент сияқты ірі қалалармен салыстырғанда жоғары. Астана тұрғындарының ипотекаға сұранысының артқанын көрсететін негізгі фактор — елордадағы тұрғын үй нарығының белсенділігі мен жаңа пәтерлердің көптеп салынуы.
Алматы қаласы да ипотека бойынша белсенді аймақтардың бірі болып қала береді. Мұнда тұрғындар тұрғын үйді сатып алу үшін ипотекалық қарызды көптеп алу үстінде. Шымкент қаласы мен Қарағанды, Ақтөбе облыстарында да ипотекалық қарыз алу көрсеткіштері айтарлықтай өскен. Бұл аймақтарда тұрғындар жаңа үй алу үшін банктерден несиелер алып, өз баспаналы болып қалуға ұмтылып жатыр.
Алайда, барлық аймақтарда ипотекаға деген сұраныс бірдей емес. Мысалы, Ұлытау мен Жетісу облыстарында керісінше, үйді несиеге алатындардың үлесі азайған. Бұл, мүмкін, өңірлердегі тұрғын үй нарығының төмендеуіне немесе басқа әлеуметтік-экономикалық факторларға байланысты болуы мүмкін.
Мұндай қарқынмен ипотекалық қарыз алушылар саны алдағы уақытта да өсе беретіні сөзсіз. Елдің әртүрлі өңірлерінде тұрғын үй мәселесіне қатысты түрлі экономикалық жағдайлар мен қажеттіліктер айқын көрініс табуда. Бұл ипотекаға деген сұраныстың артуы мен тұрғын үй нарығының дамуына әсер етуде.