Қазақстанда ата-аналардың шамамен 14 пайызы жұмысбастылықтың кесірінен балаларына жеткілікті көңіл бөле алмайды.
Бұл дерек Балалардың әл-ауқаты индексі бойынша жүргізілген ауқымды әлеуметтік зерттеу нәтижесінде белгілі болды, - деп хабарлайды Aqshamnews.kz.
Зерттеуге 93 мыңнан астам адам қатысқан, оның 52 мыңнан астамы – ата-аналар, қалғаны – оқушылар. Нәтижесінде ата-аналардың 13,9 пайызы баласына уақыт таппай жүргенін мойындаған.
Ең жоғары көрсеткіштер тіркелген өңірлер:
-
Солтүстік Қазақстан облысы – 17,9%,
-
Алматы қаласы – 17,8%,
-
Қостанай облысы – 17,3%,
-
Ақмола облысы – 16,1%.
Ал ең төмен үлес Шығыс Қазақстан (9,1%), Батыс Қазақстан (10%) және Атырау (10,6%) облыстарында байқалған.
«Ата-ананың тұрақты назары мен қолдауы – баланың эмоциялық тұрақтылығы мен жан тыныштығының басты кепілі. Ал үлкендердің жұмысбастылығы сенімді әлсіретіп, отбасындағы байланысты үзіп жібереді», – дейді Балалардың құқықтарын қорғау комитетінің төрағасы Насымжан Оспанова.
Оның айтуынша, «Адал Азамат» бағдарламасы аясында ата-аналарға қолдау көрсету орталықтары жұмыс істеп жатыр. Жаңартылған бағдарлама шеңберінде бұл орталықтар енді балалардың психикалық саулығы мен эмоциялық дамуына арналған заманауи әдістерді қамтитын болады.
UNICEF зерттеулеріне сәйкес, ата-ананың баламен күн сайын бар болғаны 10–15 минут еш алаңсыз сөйлесуі:
-
мазасыздықты азайтады,
-
өзара сенімді нығайтады,
-
баланың эмоционалдық тұрақтылығын арттырады.
Комитет мамандары ата-аналарға:
-
күн сайын ең кемі 5 минут баламен смартфонсыз, гаджетсіз ашық сөйлесуге,
-
баланың жағдайына мұқият болуға
кеңес береді.
Егер балада тұйықтық, ашушаңдық немесе алаңдаушылық белгілері байқалса, ата-аналар:
-
мектеп психологына,
-
Психологиялық қолдау орталықтарына,
-
«111» байланыс орталығына
жүгінулеріне болады.
