Елімізде ақылы автотұрақтардағы төлемді жасамай кеткен жүргізушілерге айыппұл салынбауы мүмкін. Қазіргі таңда Әкімшілік құқық бұзушылық туралы кодекске түзетулер енгізу мәселесі Мәжілісте талқыланып жатыр, деп хабарлайды aqshamnews.kz.
Мәжіліс депутаттары әкімшілік құқық бұзушылық туралы кодекске өзгерістер енгізіп, ақылы тұрақтардан түскен қаржының 75%-ын алып отырған жеке мемлекеттік серіктестерге жауапкершілікті күшейтуді көздеп отыр. Жаңа заң қабылданып, күшіне енген жағдайда, ақылы автотұраққа көлігін қоя тұрып, төлемей кеткен азаматтардың жағдайы өзгермек. Әр компания әкімшілік сотқа жүгінуге мәжбүр болады.
Нартай Сәрсенғалиев, ҚР Парламенті Мәжілісінің депутаты: "Заң күшіне енсе, көлігін қойып кетіп қалған адам үшін компаниялар сотқа баруға мәжбүр болады. Әр 100 теңге үшін соттасу қажет пе?" — деп пікір білдірді.
Елордада қазіргі таңда 7216 ақылы автотұрақ жұмыс істейді. 2018 жылы жасалған келісімшартқа сәйкес, олардың саны 10 мыңға дейін жетеді. Дегенмен, қала бюджеті айтарлықтай артып жатқан жоқ, себебі түскен ақшаның тек 25%-ы ғана бюджетке түседі. Мысалы, өткен жылы Астана халқы ақылы автотұрақтарға 250 миллион теңгеден астам ақша төлеген. Бұл мәселе депутат Нартай Сәрсенғалиевті алаңдатуда.
Нартай Сәрсенғалиев: "Бұл қаржының 100% бюджетке түсуі тиіс. Қазір жекеменшік компаниялар өздерінің мүддесін қорғап, қаржының көбін алып отыр. Бұл мәселемен күресуіміз керек."
Жергілікті билік бұл мәселені айтарлықтай алаңдатпайтын сияқты. Олар жобаның басты мақсаты қала бюджетін толтыру емес, жол қозғалысының трафигін реттеу екенін айтады. Сонымен қатар, ақылы автотұрақтарды күтіп ұстау тек әкімдіктің міндетіне кіреді, ал жеке серіктестіктің міндетіне тұрақ орындарына ақпараттық белгілерді қою, арнайы жолақтарды сызу және ереже бұзған көліктерді анықтау жұмыстары жатады.
Бауыржан Күмісбеков, Көлік және жол-көлік инфрақұрылымын дамыту басқармасының бас маманы: "Ақылы автотұрақтар коммуналдық меншік ретінде әкімдіктің меншігінде болғандықтан, оның күтіп-бапталуы да әкімшіліктің мойнында."
Депутат Нартай Сәрсенғалиев ақылы автотұрақтардағы қауіпсіздік мәселесіне де назар аударуды ұсынды. Оның айтуынша, тұрақта тұрған көлікті ұрлап кету жағдайлары орын алса, әкімдік пен жеке компания жауапкершілікті мойнына алмайды, тек қаржыны қалтаға басуды білуде.
Депутаттың сауалына Премьер-Министрдің бірінші орынбасары Роман Скляр жауап берді. Ол ақылы автотұрақтарда тегін тұру уақытын 30 минутқа ұзарту, аумақты күтіп ұстауды жеке компанияларға міндеттеу және ережелерді мемлекеттік органдардың жазуы қажеттігін атап өтті.