Осыдан бірнеше күн бұрын әл-Фараби даңғылы бойымен келе жатып, институт педиатрия аялдамасында тұрған автобусты көзім шалды. Жақындағанда байқадым көлік жүргізушісі жоқ. Жол ортасында жүргізушісіз қоғамдық көліктің жүргізушісі қайда кетуі мүмкін. Ішінде халық отыр. Сөйтсем, әлгі жүргізуші аялдама артындағы талдардың тасасынан шығып келеді. Көшеде қоғамдық дәретхана болмаған соң дәретке отырғанын түсіндім. Өз іс-әрекеті үшін ұялғанын білдіргендей көпшілікке күліп қояды.
Бұл жерде көлік жүргізушісінің еш кінәсі жоқ. Ол амалсыздан сол әрекетке барды. Өйткені қалада қоғамдық дәретхана жоқ. Бұл күндері жол жағасындағы кафе, дүкен дегендерің дәретханаға кіруге рұқсат бермейді. Олардың да есебі дұрыс. Өйткені сырттан келген адамдардың барлығына рұқсат бре берсе кешке дейін қаншама шығын келеді.
Бір-екі жыл бұрын Алматыда халық көп жиналатын жерлерде (саябақтарда, базар маңында, т.б.) орналасқан қоғамдық дәретханалар пайда болды. Бұқаралық ақпарат құралдары нақты мекенжайларды жариялап, инсталляцияның бастамашылары Visit Almaty жігіттері екенін жазған.
Тіпті 20 әжетхананың сметалық құны да жарияланды – 178,5 миллион теңге (1 дәретханаға шамамен 6,5 миллион теңге). Бұқаралық ақпарат құралдары дәретханаларда жылу болатынын, суды жылытуға арналған қазандықтар, вандализмге қарсы унитаздар, раковиналар, қол кептіргіштер, сабын салғыш және т.б. орнатылады деп болжады.
Жағдайды сол кезде қалалық туризм басқармасы басшысының орынбасары Марлен Маралов:
- Мұндай дәретханаларға сұраныс бар. Қала тұрғындары мен қонақтарының ұсынысы болған. Дәретхананың бағасы компаниялардың коммерциялық ұсыныстары негізінде жасалды. Бұл сомаға дәретхана модулін жасау, құрастыру, жеткізу құны мен сантехникалық құралдарының бағасы кіреді. Дәретханаларда желдеткіш, жылыту, сыртқы бақылау камералары орнатылған. Сондай-ақ мүмкіндігі шектеулі жандар үшін де тиісті талаптар ескерілген, - деген болатын.
Шынымен құны шамамен 6,5 миллион теңге тұратын дәретханалар істеп тұр ма? Бұған арнайы көз жеткізіп қайттық.
Сайран көлінің маңындағы дәретхана есігін аша алмаған әйелдер автовокзалға бет түзеді. Ал Әуезов атындағы Академиялық драма театрының жанындағы дәретхананың үш есігінің біреуі ғана ашық. Бірақ, ішінен жылы су немесе желдеткіш таба алмадық. Қыстың күні табиғи желденіп тұрған терезені жапсаңыз ішінде тұншығып қалу қаупі бар екенін де айта кеткен жөн болар. Ал Байтұрсынов саябағындағы қоғамдық дәретхананың есігін қанша ашамыз дегенімізден түк шықпады.
Неліктен осы әжетханаларға қызмет көрсететін адамдарды жұмысқа алып, бюджетте алдын ала қаражат төлеу қарастырылмаған? (Олар тазалықты, дәретхананың жұмысқа жарамдылығын бақылап отыруы керек).
Алматыда туристік маусым басталды. Ал, санитарлық торап деп аталатын бұл нысан қала тұрғындары мен қонақтарына есігін жауып алып ашар емес...