Басына кондиционер құлаған 23 жастағы фельдшер Ұлдана Мырзуан ауруханада көз жұмды. Қайғылы хабарды Астананың қоғамдық денсаулық сақтау басқармасы мәлімдеді, - деп хабарлайды aqshamnews.kz тілшісі.
"Тұрғын үй кешенінің қасбеті мен кондиционер құлауынан қызметтік міндеттерін атқару кезінде ауыр жарақат алған фельдшер 18 қарашада көз жұмды", - делінген хабарламада.
Ұлдана 8 қарашадан бері жансақтау бөлімінде ауыр жағдайда жатқан еді.
Оқиғаның мән-жайы
8 қарашада Астанада Тәуелсіздік даңғылы, 24Б мекенжайындағы тоғыз қабатты тұрғын үйдің қасбетінен сыртқы кірпіш қаптамасы мен кондиционер құлап, бес адам зардап шеккен еді.
Зардап шеккендер №1 көпсалалы ауруханаға жеткізілді. Бір науқастың жағдайы өте ауыр, шұғыл операция жасалды. Екеуі жансақтау бөлімінде, жағдайлары ауыр деп бағаланды. Тағы екі науқастың жағдайы тұрақты, олар бөлімшеде жатыр.
Бұған дейін әлеуметтік желіде зардап шеккен фельдшердің күйеуі видео жариялап, жұбайының адамдарға көмектесу кезінде басына кондиционер құлағанын айтқан. Оның сөзінше, әйеліне гематоманы алып тастау және бас сүйегіне трепанация жасау операциясы жасалған. Автор сондай-ақ ІІМ өндірістік жарақат жөніндегі өтінішті қабылдамай отыр деп мәлімдеген.
