Алматы онкологиялық орталығында тоқ ішектің асқынған қатерлі ісігіне және ауыр жүрек-қан тамыр ауруына шалдыққан пациентке күрделі ота сәтті жасалды.
76 жастағы науқас орталыққа ауыр халде түсті. Диагнозы - тоқ ішектің жоғары бөлімінің ІІІ сатыдағы қатерлі ісігі. Ісік жіңішке ішекке өтіп, жыланкөз түзіп, ағзаның улануына және анемияның үдеуіне әкелген. Гемоглобин деңгейі - 69 г/л (әйелдер үшін қалыпты көрсеткіш 120–150 г/л).
Басты қиындық - жүректегі ауыр патология: жүректің ишемиялық ауруы, 2022 жылы жасалған аортокоронарлық шунттау және сол жақ қарынша жұмысының фракциясы - небәрі 28-30% (қалыптысы 55-70%).
"Біз қиын таңдау алдында тұрдық: ота жасалмаса, науқас өмірмен қош айтысуы мүмкін еді, ал жүрек жағдайына байланысты кез келген хирургиялық ем-дом аса қауіпті болды", - дейді онколог Асылбек Қаржауов.
Хирургтар, кардиологтар және анестезиолог-реаниматологтар консилиумы өмірлік көрсеткіштер бойынша ота жасау туралы шешім қабылдады.
Науқасты отаға дайындау барысында оның жағдайын тұрақтандыру, қан көлемін толықтыру және анемияны түзету шаралары жүргізілді. Анестезиологтар жүрек резервінің төмендігін ескере отырып, жеке анестезиялық хаттама жасады.
Ота – лапаротомия, кеңейтілген оң жақты гемиколэктомия және жіңішке ішектің бірнеше бөлігіне резекция жасау 55 минутқа созылды.
Зақымдалған аймақтар, оның ішінде лимфа түйіндері алынып, көзге көрінетін ісік тіндері толық жойылды.
"Заманауи құрылғылармен жабдықталған ота бөлмелері күрделі науқастарда да жоғары дәлдікпен және қан жоғалтуды азайта отырып жұмыс істеуге мүмкіндік береді. Бұл әлсіреген пациенттер үшін өте маңызды", - деді Асылбек Қаржауов.
Отадан кейін науқас анестезиология және реанимация бөліміне ауыстырылып, тәулік бойы бақылауға алынды.
"Біздің міндетіміз науқасты наркоздан жайлы шығуын қамтамасыз ету, жүрек пен өкпе қызметін қолдау, тромбоэмболиялық және инфекциялық асқынулардың алдын алу болды. Жеке инфузиялық, антибактериалды және кардиотоникалық терапия арқасында жағдай тұрақтанды", - дейді реанимация бөлімінің меңгерушісі Рамис Мурадов.
Отадан кейінгі келесі күні науқас белсенді қозғала бастады, ал екі күннен соң жалпы палатаға ауыстырылды.
Сегізінші күні амбулаториялық ем жалғастыру үшін үйіне шығарылды.
Бұл жағдай Алматы онкологиялық орталығының ең күрделі науқастармен де жұмыс істей алатынын айқын көрсетеді.
Мультидисциплинарлық тәсіл, хирургтар мен анестезиологтардың тәжірибесі, заманауи медициналық жабдық - мұның бәрі үміт үзілген кезде де адам өмірін сақтап қалуға мүмкіндік береді.