Алматыда ел Президентінің бастамасымен «Келешек мектептері» ұлттық жобасы аясында бой көтеріп жатқан мектеп аумағына 500-ден астам ірі көлемді ағаш егілді. Көгалдандыру жұмыстары Түрксіб ауданындағы Қайрат шағынауданы аумағында салынып жатқан мектептің жанында жүргізілді. Игі істі «Azimut» ЖШС компаниясы қаржыландырып, «Таза Қазақстан» республикалық бағдарламасына қолдау көрсетті.
Жобалық шешімге сәйкес, құрылысшы компания бар болғаны 50 тал егуге тиіс еді. Алайда компания бастаманы кеңейтіп, көлемді арттыру туралы ұсыныс жасап, қаланың көгал қорын көбейтуге үлес қосты.
Сәнағаш, ұлпасыз терек, арша, мойыл, шаған, қарағай және сәндік бұталар сынды егілген жасыл желектер қала жағдайына бейімделген. Таңдалған көшеттер болашақ мектеп аумағын көркейтіп қана қоймай, оқушылар мен маңайдағы тұрғындар үшін қолайлы экологиялық орта қалыптастырады.
Айта кетейік, Президент бастамасымен жүзеге асырылып жатқан «Келешек мектептері» ұлттық жобасы аясында қалада 23 100 оқу орнына арналған 13 жаңа жайлы мектеп салынды. Биыл тағы 11 700 оқушыға арналған 8 мектепті пайдалануға беріледі. Олар үшінші тоқсанда ашылады деп жоспарланып отыр.