Түркістан облысында үй өртеніп, салдарынан 12 адам қаза тапты. Көршілері қайғылы оқиға туралы айтты, - деп хабарлайды aqshamnews.kz тілшісі otyrar.kz-ке сілтеме жасап.
Жетісайда болған алапат өрттен қаза тапқандардың барлығы - бір әулеттің мүшелері.
"Олар үш ағайынды. Әулет мүшелері көрші ауылдағы ағасының ұлының сүндет тойынан келе жатып, Алғабас ауылындағы туыстарының үйіне түнеген. Түн ортасында 360 шаршы метрлік екі қабатты коттедж отқа оранып, 12 адам көз жұмды. Өрт салдарынан үй иесі мен оның отбасы мүшелері қаза тапты", - деп жазылған басылым мәліметінде.
Көршілері оқиға қалай болғанын айтты.
"Таңғы сағат 5:05-те көрдім. Келіншегі "апа, жәрдемдесіңіздерші" деп айқайлап тұр екен. Сыртқа шыға алмай тұрды. Көршілерге жүгірдім. От қып-қызыл болып жанып жатыр екен. Біреуі оянды, біреуі оянбады. Баламды ояттым, біреуін алып шықты. егіздің біреуін көрдім, шашы күйіп кеткен", - дейді Қанайым Жүнісова.
Оқиғаның мән-жайы
Түркістан облысы Төтенше жағдайлар департаментінің мәліметінше, 18 қарашада таңертең Жетісай ауданына қарасты Алғабас ауылындағы екі қабатты жеке тұрғын үйден өрт шыққаны туралы хабар түскен.
Оқиға орнына жеткен өртсөндірушілер келген сәтте үй толықтай өртке оранғаны анықталған. Өртті сөндіру және барлау кезінде үйден ес-түссіз жатқан үш адам эвакуацияланып, жедел жәрдем бригадасына тапсырылды.
"Үйдің ішінен 12 адамның мәйіті табылды, олардың тоғызы – бала", – делінген ТЖД хабарламасында.
Көршілердің айтуынша, оқиға болған үйде қонақтар болған, себебі алдыңғы күні үй иелерінде іс-шара өткен. Өрт 360 шаршы метр аумақта толық сөндірілді.
Қазір оқиға орнында барлық жедел қызмет жұмыс істеп жатыр. Өрттің шығу себебі анықталып жатыр, тергеу басталды.
Үкімет пен Түркістан облысының әкіміне зардап шеккен азаматтардың туған-туыстарына барлық қажетті көмек көрсетіп, қайғылы оқиғаны жан-жақты тексеруді тапсырды.
