جەتىسۋ اۋدانى جۇيەلى تۇردە جاڭعىرتىلىپ، ءقاۋىپسىز ءارى جايلى قالالىق ورتا قۇرۋ باعىتىندا ناقتى قادامدار جاساپ كەلەدى. سونىڭ ىشىندە سىرتقى جارىقتاندىرۋ جۇيەسىن جاڭارتۋ – ماڭىزدى باسىمدىقتىڭ ءبىرى. قالالىق باعدارلامالاردى ىسكە اسىرۋ مەن ينفراقۇرىلىمعا سالىنعان ينۆەستيسيالار ناتيجەسىندە اۋداننىڭ كەشكى جانە تۇنگى كەلبەتى ايتارلىقتاي وزگەرىپ جاتىر: كوشە مەن اۋلالار، قوعامدىق ورىندار جاڭا، ۇنەمدى جانە بىركەلكى جارىقپەن قامتىلا باستادى. ءلاززات جىلقىبايەۆا الماتى قالاسىنىڭ وڭىرلىك كوممۋنيكاسيالار قىزمەتىندەگى باسپا ءسوز كونفەرەنسياسىندا وسىلاي دەدى.
قازىرگى تاڭدا جەتىسۋ اۋدانىندا 20 344 جارىق نۇكتەسى جۇمىس ىستەيدى. ونىڭ ىشىندە 13 793ء-ى – ەنەرگيا ۇنەمدەيتىن LED شامدار، ال 6 551ء-ى – ەسكى ۇلگىدەگى كونسولدى شامدار (جكۋ). 171 سىرتقى جارىقتاندىرۋ شكافى (شۋنو) جۇيەنىڭ ۇزدىكسىز جۇمىسىن قامتاماسىز ەتىپ وتىر. اكىمنىڭ ايتۋىنشا، ەسكى شامداردى جوندەپ، LED شامدارعا اۋىستىرىپ، جارىقسىز قالعان كوشەلەردى جارىقپەن قامتۋ جۇمىستارى ۇزدىكسىز جۇرگىزىلىپ جاتىر. ءقازىر 22 كوشەنى تولىق جارىقتاندىرىپ بىتكەن، تاعى 94 كوشە مەن وتكەلدە جۇمىس جالعاسىپ جاتىر. بارلىعى 116 ۋچاسكە قامتىلعان.
ەنەرگيا تيىمدىلىگى دە باستى نازاردا. كوكجيەك، اينابۇلاق شاعىن اۋداندارىندا، رايىمبەك–ءسۇيىنباي–رىسقۇلوۆ–ستانيسلاۆسكيي كوشەسىنىڭ شەڭبەرىندە ەسكى سارعىش شامداردى وسى زامانعى LED شامدارعا الماستىردى. بۇل جارىق ساپاسىن جاقسارتىپ قانا قويماي، ەنەرگيا شىعىنىن ازايتۋعا، ەكولوگيالىق اسەردى تومەندەتۋگە مۇمكىندىك بەردى.
سونىمەن قاتار، سىرتقى جارىقتاندىرۋدى كەڭەيتۋگە باعىتتالعان ەكى ءىرى جوبا ىسكە اسىرىلىپ جاتىر. ءبىرىنشىسى – 33 كوشەنى قامتىسا، ەكىنشىسى – 11 ۋچاسكەدەگى تروتۋارلار مەن ساياباقتارعا باعىتتالعان. بۇل جوبالار اياسىندا 66 شاقىرىم كابەل، 824 جارىق تىرەۋى، 1 300 شام جانە 2 900 تورشەر ورناتۋ جوسپارلانعان. بۇل ءوز كەزەگىندە اۋدانداعى نەگىزگى كوشەلەر مەن دەمالىس ايماقتارىنىڭ قاۋىپسىزدىگىن ارتتىرادى.
قالانىڭ ەستەتيكالىق كەلبەتىن جاقسارتۋ دا ماڭىزدى باعىتتىڭ ءبىرى. قازىرگى ۋاقىتتا جەتىسۋ اۋدانىندا ارحيتەكتۋرالىق-فاسادتىق جارىقتاندىرۋ جوباسى قولعا الىندى. ءبىرىنشى كەزەڭدە 29 عيمارات، ونىڭ ىشىندە 9 الەۋمەتتىك نىسان مەن 20 كوپقاباتتى تۇرعىن ءۇي جارىقتاندىرىلادى. بۇل جوبا كەشكى جانە تۇنگى ۋاقىتتا اۋدانعا ەرەكشە كورىك بەرىپ، ونىڭ تارتىمدىلىعىن ارتتىرادى.
جالپى العاندا، جارىقتاندىرۋدى دامىتۋ بويىنشا جۇرگىزىلىپ جاتقان كەشەندى شارالار جەتىسۋ اۋدانىنداعى 200 مىڭعا جۋىق تۇرعىننىڭ ءومىر ءسۇرۋ ساپاسىن جاقسارتۋعا، سونداي-اق اۋداندى جاڭا، ءقاۋىپسىز ءارى ۇيلەسىمدى قالالىق كەڭىستىككە اينالدىرۋعا باعىتتالعان.