اۋەجايدا ۇشۋعا دەيىنگى تەكسەرىستەن ءوتۋ كەزىندە اياق كيىمدى نەگە شەشۋ كەرەگىن كوپشىلىك تۇسىنبەي جاتادى، دەپ حابارلايدى aqshamnews.kz Tengritravel.kz-كە سىلتەمە جاساپ.
ەگەر اياق كيىم كيىمنىڭ ءبىر بولىگى بولسا جانە كۇمان تۋدىرماسا، نەگە شەشۋ كەرەك؟
بۇل سۇراققا استانا اۋەجايىنىڭ PR قىزمەتىنىڭ جەتەكشىسى ناۋات ايتۋعانوۆا جاۋاپ بەردى.
ونىڭ ايتۋىنشا، بۇل جاي عانا تالاپ ەمەس، الەمنىڭ كوپتەگەن اۋەجايىندا قولدانىلاتىن اۆياسيالىق قاۋىپسىزدىك شاراسى.
"الەمنىڭ كوپتەگەن اۋەجايىندا جولاۋشىلاردان تەكسەرىس كەزىندە اياق كيىمدى شەشۋدى سۇرايدى. كوپ ادامعا بۇل ارتىق سياقتى كورىنۋى مۇمكىن، الايدا بۇل شارا اۆياسيالىق قاۋىپسىزدىكپەن بايلانىستى. كەيدە ءدال اياق كيىمنىڭ ىشىندە تىيىم سالىنعان زاتتار جاسىرىلۋى مۇمكىن، ال ولاردى ستاندارتتى سكانەرلەرمەن انىقتاۋ ءاردايىم وڭاي بولا بەرمەيدى. قالىڭ تابان، جاسىرىن مەتالل ەلەمەنتتەر نەمەسە قوسىمشا بولشەكتەر ساپالى تەكسەرۋگە كەدەرگى كەلتىرۋى مۇمكىن"، – دەپ ءتۇسىندىردى ول.
مامان بۇل تاجىريبە العاش رەت 2001 جىلدىڭ جەلتوقسانىندا ەنگىزىلگەنىن اتاپ ءوتتى.
"بۇل تاجىريبەنىڭ تاريحى 2001 جىلدىڭ جەلتوقسانىندا بريتاندىق ريچارد رەيد ەسىمدى ازامات ۇشاققا جارىلعىش زاتتى اياق كيىمىنىڭ تابانىنا جاسىرىپ الىپ وتپەك بولعان كەزدەن باستالادى. ونىڭ جوسپارى جۇزەگە اسپادى، ءبىراق بۇل وقيعا بۇكىل الەمدەگى قاۋىپسىزدىك قىزمەتتەرى ءۇشىن بەتبۇرىس ساتىنە اينالدى. سودان بەرى اياق كيىمدى تەكسەرۋ كوپتەگەن ەلدە مىندەتتى شاراعا اينالدى"، – دەپ تولىقتىردى مامان.
ول قازىرگى قاۋىپسىزدىك جۇيەلەرى كوپتەگەن جىلدارداعى تاجىريبە مەن ناقتى قاۋىپتەردى تالداۋدىڭ ناتيجەسى ەكەنىن اتاپ ءوتتى.
"اياق كيىمدى شەشىپ، تەكسەرىستەن ءوتۋ سياقتى قاراپايىم ارەكەتتەر – بارلىق جولاۋشىنىڭ قاۋىپسىزدىگىن قامتاماسىز ەتۋگە كومەكتەسەدى. بۇل – ەرىككەندىكتەن ەمەس، تاجىريبەگە سۇيەنىپ، مۇمكىن قاۋىپتەردىڭ الدىن الۋ ءۇشىن قاجەت شارا"، – دەپ تۇيىندەدى ول.
سوندىقتان، ەگەر تەكسەرىس كەزىندە سىزدەن اياق كيىمىڭىزدى شەشۋدى سۇراسا، رەنجىمەڭىز جانە مۇنى ۇساق-تۇيەككە بالاماڭىز. بۇل – بارشا جولاۋشىلاردىڭ قاۋىپسىزدىگىن قامتاماسىز ەتۋگە باعىتتالعان ستاندارتتى پروسەدۋرالاردىڭ ءبىر بولىگى.