جەتىسۋ اۋدانىنىڭ اكىمى اۋدانداعى اباتتاندىرۋ مەن ينفراقۇرىلىمدى دامىتۋدى كوزدەيتىن نەگىزگى جوبالار تۋرالى ايتتى
وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا جەتىسۋ اۋدانىنىڭ اكىمى ءلاززات جىلقىبايەۆا اۋدان كولەمىندە قولعا الىنعان اباتتاندىرۋ، ينجەنەرلىك جەلىلەردى جاڭعىرتۋ مەن جايلى قالالىق ورتانى قالىپتاستىرۋدى كوزدەيتىن جوبالارمەن تانىستىردى.
اۋدان اكىمى اتاپ وتكەندەي، 2025 جىلى جەتىسۋ اۋدانىندا تۇرعىنداردىڭ ءومىر ءسۇرۋ ساپاسىن ارتتىرۋعا باعىتتالعان اۋقىمدى باعدارلاما ىسكە اسىرىلىپ جاتىر. «جۇمىستى كەزەڭ-كەزەڭىمەن، جۇيەلى تۇردە جۇرگىزىلىپ جاتىرمىز. قوعامدىق كەڭىستىكتەردى اباتتاندىرۋعا، قاۋىپسىزدىكتى ارتتىرىپ، ينجەنەرلىك ينفراقۇرىلىمدى جاڭارتۋعا كوپ كوڭىل بولدىك»، – دەدى لياززات جىلقىبايەۆا.
باستى باسىمدىقتىڭ ءبىرى – توتەنشە جاعدايدىڭ الدىن الۋ. «قالا اكىمىنىڭ تاپسىرماسىنا سايكەس شەليحوۆ پەن ۆولوچايەۆسكايا كوشەسىندەگى بەتكەيلەردى بەكىتۋ جۇمىستارى اياقتالدى. سىرعىما ءقاۋپى جويىلىپ، تۇرعىندار ەندى الاڭسىز ءومىر سۇرەتىن بولدى»، – دەپ اتاپ ءوتتى اكىم.
سونداي-اق، ءبىرقاتار ماڭىزدى اۋماقتاردىڭ اباتتاندىرىلعانى تۋرالى ايتىلدى: «كوكمايسا شاعىن اۋدانىنداعى ساياباق ايماعى، كوكجيەك شاعىن اۋدانىنداعى ەسەنتاي وزەنىنىڭ بويىنداعى جاعالاۋ مەن چەرنوۆيسكايا كوشەسىنىڭ ۋچاسكەسى جاڭارتىلدى. اتالعان جەرلەرگە بالالار مەن سپورت الاڭدارىن ورناتىپ، كوگالداندىرىپ، جارىق تارتىلىپ، كىشى ارحيتەكتۋرالىق فورمالار قويىلدى».
ازاماتتىق باستامانىڭ ماڭىزدىلىعىنا توقتالا وتىرىپ، ءلاززات جىلقىبايەۆا «حالىق قاتىساتىن بيۋدجەت» باعدارلاماسىنىڭ ءرولىن ەرەكشە اتاپ ءوتتى: «2025 جىلى حقب اياسىندا 2 ميلليارد تەڭگە كولەمىندە 30 جوبا ىسكە اسىرىلىپ جاتىر. بۇل – اۋلانى، جاياۋ جۇرگىنشىلەر ايماقتارىن اباتتاندىرۋدان باستاپ، جاسىل اۋماقتار مەن اۆتوماتتى سۋارۋ جۇيەلەرىن ورناتۋعا دەيىنگى تۇرعىنداردىڭ باستاماسى».
اكىمنىڭ ايتۋىنشا، قازىرگى تاڭدا قاراسۋ وزەنىنىڭ بويىنداعى جاعالاۋدى اباتتاندىرۋ قولعا الىنعان. «جوبا قالا تۇرعىندارىنا ارنالعان تاعى ءبىر جايلى قوعامدىق دەمالىس ورنىن اشۋعا مۇمكىندىك بەرەدى»، – دەدى ول.
مۇمكىندىگى شەكتەۋلى ازاماتتار ءۇشىن كەدەرگىسىز ورتا قالىپتاستىرۋعا ەرەكشە كوڭىل بولىنگەن. «قازىرگى ۋاقىتتا 13 جەر ءۇستى جاياۋ جۇرگىنشىلەر وتكەلىندەگى كوتەرگىشتەردى جوندەۋ مەن اۋىستىرۋ جۇمىستارى جۇرگىزىلىپ جاتىر. بۇل – از قوزعالاتىندارعا وتە قاجەت»، – دەپ اتاپ ءوتتى اكىم.
«اينابۇلاق-2 جانە اينابۇلاق-4 شاعىن اۋداندارىنداعى ەسەنتاي وزەنىنىڭ جاعالاۋلارىن، كوكمايسا شاعىناۋدانىنداعى سكۆەردى، پاللادين كوشەسىندەگى جاياۋ جۇرگىنشىلەر ايماعىن جانە 42 اۋلا اۋماعىن كۇردەلى جوندەۋ بويىنشا جوبالىق-سمەتالىق قۇجاتتاما ازىرلەنىپ جاتىر. بارلىق اۋماق وسى زامانعى ستاندارتتار مەن تۇرعىنداردىڭ قاجەتتىلىگىن ەسكەرە وتىرىپ اباتتاندىرىلادى»، – دەدى ءلاززات جىلقىبايەۆا.
اۋدان باسشىسى ينجەنەرلىك ينفراقۇرىلىمدى جاڭعىرتۋ بويىنشا دا دەرەكتەردى ۇسىندى. «الماتى سۋ» شكك-مەن بىرلەسىپ، ۇزىندىعى 3،6 شاقىرىم بولاتىن التى ۋچاسكەدە سۋ مەن كارىز جەلىسىن قايتا جاڭارتۋ جۇمىستارى جۇرگىزىلىپ جاتىر. سونىمەن قاتار، «الماتى جىلۋ جۇيەلەرى» ج ش س اينابۇلاق-1 شاعىناۋدانىندا جىلۋ جەلىلەرىن كۇردەلى جوندەۋگە باعىتتالعان ەكى جوبانى جۇزەگە اسىرا باستادى»، – دەدى اكىم.
ءسوز سوڭىندا ءلاززات جىلقىبايەۆا اۋداننىڭ رەسپۋبليكالىق «تازا قازاقستان» ەكولوگيالىق اكسياسىنا بەلسەندى قاتىسىپ جاتقانىن اتاپ ءوتتى: «جەتىسۋ اۋدانى «تازا قازاقستان» باستاماسىن قولدايدى. ءبىز تازالىق ورناتىپ قانا قويماي، قورشاعان ورتاعا جاۋاپتىلىقپەن قارايتىن مادەنيەتتى دە قالىپتاستىرىپ جاتىرمىز».