2025 جىلدىڭ سوڭىنا دەيىن بوستاندىق اۋدانىندا ەكى جاڭا مەكتەپ اشىلىپ، 10 مەكتەپ پەن 5 بالاباقشا جاڭارتىلادى
جايلى مەكتەپ» ۇلتتىق جوباسى مەن ءبىلىم بەرۋ مەكەمەلەرىن جاڭعىرتۋ باعدارلاماسى اياسىندا بوستاندىق اۋدانى جاڭا نىساندار سالىپ، مەكتەپتەر مەن بالاباقشالاردى قايتا قۇرىپ، كۇردەلى جوندەۋدەن وتكىزىپ جاتىر. وڭىرلىك كوممۋنيكاسيالار قىزمەتىنىڭ باسپا ءسوز ءماسليحاتىندا بوستاندىق اۋدانىنىڭ اكىمى سانجار ءالين زامانعا ساي وقۋى ءۇشىن بالالاردىڭ جاعدايىن جاساپ، ورىن تاپشىلىعىن ازايتىپ، بارلىق ساناتتاعى بالالاردىڭ بىلىمگە قولى جەتەتىندەي ەتۋ نەگىزگى باسىمدىق ەكەنىن اتاپ ءوتتى.
بيىل قىركۇيەك ايىندا اۋدان اۋماعىندا «جايلى مەكتەپ» جوباسى اياسىندا 4000 وقۋشىعا ارنالعان ەكى جاڭا مەكتەپ اشىلادى. مامىر ايىندا روزىباقييەۆ كوشەسىندە 1500 ورىندىق مەكتەپتىڭ قۇرىلىسى اياقتالدى. نىساننىڭ قۇنى – 7،8 ملرد تەڭگە. تامىز ايىندا ەگىزبايەۆ كوشەسىندە 2500 ورىندىق تاعى ءبىر ۇلكەن مەكتەپ سالىنىپ بىتپەك. ونىڭ قۇنى – 11،9 ملرد تەڭگە. بۇعان قوسا، قىركۇيەك ايىندا №73 مەكتەپكە قوسىمشا 450 ورىندىق جاپسارلاس عيمارات سالىنىپ، مەكتەپ عيماراتىنا رەكونسترۋكسيا جاسالىپ بىتەدى. بۇل اۋدان مەكتەپتەرىندەگى جۇكتەمەنى ازايتۋعا مۇمكىندىك بەرمەك.
جىل سوڭىنا دەيىن №10 مەكتەپ-ينتەرناتتا (1،3 ملرد تەڭگە)، №189 (2،5 ملرد تەڭگە) جانە №191 (1،7 ملرد تەڭگە) مەكتەپتەرىندە سەيسميكالىق كۇشەيتۋمەن قاتار كۇردەلى جوندەۋ جۇمىستارى اياقتالادى. سونداي-اق رەسپۋبليكالىق فيزيكا-ماتەماتيكا مەكتەبىنىڭ عيماراتى قايتا جاڭارتىلىپ جاتىر. بۇل جوباعا 5،5 ملرد تەڭگە بولىنگەن. اتالعان جوبالاردىڭ جالپى قۇنى – 11 ملرد تەڭگە. ءساۋىر ايىندا №60 مەكتەپتى جاڭعىرتۋ جۇمىسى باستالدى. 5،7 ملرد تەڭگە سوماسىنا جۇرگىزىلىپ جاتقان بۇل جۇمىستى 2026 جىلدىڭ قىركۇيەگىندە اياقتاماق ويدا.
بالاباقشاداعى ورىن تاپشىلىعىن ازايتۋ ءۇشىن بيىلعى ناۋرىز ايىندا وربيتا-3 شاعىناۋدانىنداعى بۇرىنعى بالالار ءۇيىنىڭ ەكى عيماراتى قايتا جوندەۋدەن ءوتتى. ونىڭ ءبىرى – 240 ورىندىق بالاباقشا رەتىندە، ەكىنشىسى – ەرەكشە ءبىلىم بەرۋدى قاجەت ەتەتىن بالالارعا ارنالعان 100 ورىندىق ارناۋلى تۇزەتۋ بالاباقشاسى رەتىندە جۇمىس ىستەيدى. قۇرىلىس جۇمىسىنىڭ قۇنى – 3،6 ملرد تەڭگە. سونىمەن قاتار 2025 جىلدىڭ سوڭىنا دەيىن №81، №87 جانە №137 بالاباقشالارىندا سەيسميكالىق كۇشەيتۋمەن قاتار كۇردەلى جوندەۋ جۇرگىزىلەدى. بۇل جوبالارعا جالپى 4،3 ملرد تەڭگە بولىنگەن.
ماڭىزدى جوبانىڭ ءبىرى – جاڭا وقۋشىلار ءۇيىنىڭ قۇرىلىسى بولدى. ءساۋىر ايىندا 1964 جىلى سالىنعان ەسكى عيمارات بۇزىلىپ، ونىڭ ورنىنا وسى زامانعى جاڭا نىسان بوي كوتەردى. 2025 جىلدىڭ ماۋسىم ايىندا وقۋشىلار ءۇيى اۋدانداعى بالالار مەن جاسوسپىرىمدەرگە اشىق بولدى.
اتالعان جوبانىڭ بارلىعى بوستاندىق اۋدانىنداعى ءبىلىم بەرۋ جۇيەسىن جاڭعىرتۋعا باعىتتالعان اۋقىمدى باعدارلامانىڭ ءبىر بولىگى جانە ءوسىپ كەلە جاتقان ۇرپاقتىڭ ساپالى ءبىلىم الىپ، جان-جاقتى دامۋىنا قولايلى جاعداي جاساۋعا ارنالعان.