ءبىلىم بەرۋ جۇيەسىندە ارنايى ازىرلەنگەن "ۇستاز" ۇلتتىق پلاتفورماسى جاپپاي قولدانىسقا ەنگىزىلدى.
بۇگىنگى تاڭدا بۇل جۇيەگە 640 مىڭنان استام پەداگوگ تىركەلىپ، وزدەرىنىڭ جەكە كابينەتىن اشقان، دەپ حابارلايدى aqshamnews.kz
ولاردىڭ قاتارىنا مەكتەپكە دەيىنگى، جالپى ورتا، ارنايى، قوسىمشا، تەحنيكالىق جانە كاسىپتىك ءبىلىم بەرۋ ۇيىمدارىنىڭ ۇستازدارى كىرەدى.
ءقازىردىڭ وزىندە 95 مىڭنان استام ءمۇعالىم كاسىبي بىلىكتىلىگىن راستاۋدى باستاپ كەتتى. سونىمەن قاتار 40 مىڭعا جۋىق پەداگوگتىڭ ءوتىنىشى بويىنشا شەشىم قابىلدانىپ، ولاردىڭ بىلىكتىلىك دەڭگەيى انىقتالعان.
پلاتفورمانىڭ باستى ارتىقشىلىعى – باعالاۋ پروسەسىنىڭ ادىلدىگى مەن اشىقتىعى. ءمۇعالىمنىڭ بىلىكتىلىك دەڭگەيى تەك كوميسسيانىڭ شەشىمىمەن عانا ەمەس، اۆتوماتتاندىرىلعان جۇيە ارقىلى انىقتالادى. بۇل ءتاسىل ادام فاكتورىن ازايتىپ، ءادىل باعالاۋعا مۇمكىندىك بەرەدى.
سالا ماماندارىنىڭ ايتۋىنشا، ونلاين اتتەستاتتاۋ مۇعالىمدەردى ۇزدىكسىز دامۋ مەن ءوزىن-وزى جەتىلدىرۋگە ىنتالاندىرادى. بىلىكتىلىگىن دالەلدەگەن ۇستازدار لايىقتى دەڭگەي مەن قوسىمشا ىنتالاندىرۋعا يە بولادى.