Almaty qalasynyń mamandandyrylǵan ekologıalyq prokýratýrasy men qalalyq Ekologıa jáne qorshaǵan orta basqarmasy, "İle-Alataý memlekettik ulttyq tabıǵı parkimen" birlesip, Aıýsaı shatqalynda ekologıalyq senbilik ótkizdi.
Maqsat– tabıǵı aýmaqtardy taza ustaý, adamdardyń ekologıalyq mádenıetin kóterý. Ulttyq saıabaqtyń aýmaǵy turmystyq qaldyqtardan tazartylyp, jınalǵan qoqys polıgonǵa shyǵaryldy. Senbilikke memlekettik organdardyń ókilderi, ekologıalyq uıymdar, stýdentter men belsendi jastar qatysty.
Almaty qalasy Ekologıa jáne qorshaǵan orta basqarmasynyń Qaldyqtardy basqarý bóliminiń bas mamany Erkebulan Ertaıuly jyl basynan beri Almaty qalasy boıynsha 300-den astam ekologıalyq is-shara uıymdastyrylǵanyn aıtty. Olardyń qatarynda senbilikter, turmystyq qaldyqtardy bólek jınaý aksıalary, plasıkalyq bótelkeler men qaqpaqtardy jınaýǵa arnalǵan "Meıirimdi qaqpaq" sekildi ekologıalyq bastamalar bar.
"Senbilikterdi biz qala aýmaǵynda ǵana emes, taý shatqaldarynda da jıi ótkizemiz. Kóbine ulttyq saıabaqtar men tabıǵı aýmaqtardyń ótinishi boıynsha uıymdastyrylady",- dedi ol.
Al ekolog Evgenıı Muhamedjanovtyń aıtýynsha, tabıǵatty qorǵaý men tazalyqty saqtaý árkimniń ishki mádenıeti men ómirge degen kózqarasyna baılanysty.
"Ózin syılaıtyn, ózin qurmetteıtin adam eshqashan qoqys tastamaıdy. Ekologıalyq mádenıet – tek tabıǵatty qorǵaý emes, ol qoǵamnyń ózine jáne bolashaǵyna degen qurmetiniń kórinisi. Sondyqtan bos urandar men plakattardyń qajeti shamaly", -deıdi ekolog.
Sondaı-aq, ol keıingi jyldary Almaty qalasynda ekologıalyq mádenıet edáýir jaqsarǵanyn atap ótti:
"Men bul ispen jeti jyldan beri aınalysamyn. Sol ýaqyt ishinde qala qatty ózgerdi. Buryn Almaty kósheleri qoqysqa toly edi, qazir jaǵdaı áldeqaıda jaqsarǵan. Tipti, qazir senbilik ótkizetin oryn tabý da qıyndap barady, sebebi qala taza. Osyndaı is-sharalar arqyly qoǵamda birtindep ortaq ekologıalyq sana qalyptasyp keledi.Buryn kóshelerde temeki tuqyly men bótelke kóp bolatyn, al qazir adamdar ondaı áreketke barmaıdy. Múmkin, taǵy on jyldan keıin bárimiz bir rettik plasıkti qoldanbaı, óz ydysymyzdy alyp júretin bolamyz. Mine, naǵyz mádenıetti qoǵamnyń kórinisi osy. Bizdiń volonterler qozǵalysy keıingi eki jylda belsendi damyp keledi. Buryn negizinen iri kompanıalarmen jumys istesek, qazir myńdaǵan erikti óz erkimen qatarymyzǵa qosylyp jatyr. Eń kishkentaı volonterimiz – 9 jasta, al úlkenderi – 60–70 jastaǵy adamdar. Ekologıalyq qozǵalystyń barlyq jastaǵy azamattar úshin ortaq qundylyqqa aınalǵanynyń dáleli deýge ábden bolady",-deıdi Evgenıı Muhamedjanov.