Almatyda qoǵamdyq oryndarda elektroshokerdi qoldaný arqyly aınalasyndaǵylardy úreılendirgen 34 jastaǵy qala turǵyny jaýapkershilikke tartyldy, - dep habarlaıdy aqshamnews.kz.
Polısıa qyzmetkerleri anyqtaǵandaı, er adam elektroshokerdi adamdarǵa tikeleı qoldanbaǵanymen, ony túrli zattarǵa paıdalanyp, qaýip tóndiretin jaǵdaı jasap, ótip bara jatqan azamattardyń qorqynysh sezimin týdyrǵan. Bul áreket – qoǵamdyq tártipti buzý retinde tirkeldi.
Atalǵan derek boıynsha ol usaq buzaqylyq jáne arnaıy quraldardy zańsyz qoldaný faktileri boıynsha jaýapqa tartyldy. Mamandandyrylǵan aýdandyq ákimshilik sottyń sheshimimen quqyq buzýshy kináli dep tanylyp, 10 táýlikke qamaýǵa alý jazasy taǵaıyndaldy. Polısıa ókilderi azamattarǵa qaýip tóndiretin nemese qorqynysh sezimin týdyratyn kez kelgen áreketke quqyqtyq turǵyda qaǵıdatty baǵa beriletinin atap ótti.
– Elektroshoker tikeleı adamǵa qoldanylmasa da, ony qoǵamdyq oryndarda kórsetý men paıdalaný aınaladaǵylardyń úreıine, dúrbeleńge sebep bolýy múmkin. Mundaı áreketter qoǵamdyq tártipti buzý bolyp sanalady jáne jaýapkershilikke ákeledi. Azamattardy tártip normalaryn saqtaýǵa shaqyramyz. Adamdardyń qaýipsizdigi – basty basymdyq, – dep qorytyndylady Almaty qalasy PD qoǵamdyq qaýipsizdik basqarmasynyń bastyǵy Asqat Qulbaev.