Tumaýdan basqa, elimizde ózge de vırýsty ınfeksıalar anyqtaldy.
Saılaý kúninde komısıa músheleri betperdeni 3 saǵat saıyn almastyrýy kerek. Bul týraly búgin QR Densaýlyq saqtaý vıse-mınıstri – Bas memlekettik sanıtarlyq dáriger Aıjan Esmaǵambetova aıtty, dep habarlaıdy Almaty-akshamy.kz QazAqparatqa silteme jasap.
«Tumaýdan basqa, elimizde ózge de vırýsty ınfeksıalar anyqtaldy. Olar: rınovırýsty, resvırýsty, adenovırýsty, bokavırýsty, metapnevmovırýsty jáne paragrıpp. Respýblıkamyzda jiti respıratorlyq vırýsty ınfeksıa jáne tumaýmen syrqattanýdyń artýyn, koronavırýs ınfeksıasy boıynsha jaǵdaıdyń turaqty ekendigin eskere otyryp, saılaýdy ótkizý kezinde saılaý komısıasy músheleri betperde tártibin saqtaýy, bir ret qoldanylatyn betperdeni ár úsh saǵat saıyn almastyrýy qajet», - dedi vıse-mınıstr búgin QR Ortalyq saılaý komısıasynyń otyrysynda.
Onyń atap ótýinshe, halyqtyń kóp jınalýyn boldyrmaý úshin barynsha keń bólmelerdi paıdalaný qajet.
«Bólmelerdi jeldetý júıesi úzilissiz jumys isteýi kerek. Al jasandy jeldetý júıesi bolmaǵan jaǵdaıda, is-sharalardy ótkizý aldynda bólme aýasyn tazartý qajet», - dedi Aıjan Esmaǵambetova.