Mektepke deıingi jáne orta bilim berý komıteti mınıstr Asqat Aımaǵambetovtiń «Orta bilim berý uıymdarynda 2022–2023 oqý jylynyń bastalýyn, uzaqtyǵyn jáne kanıkýl kezeńderin aıqyndaý týraly» buıryǵynyń jobasyn ázirledi.
Aty aıtyp turǵandaı, qujat jańa oqý jylyndaǵy balalardyń demalys merzimderin ózgertedi, dep habarlaıdy Almaty-akshamy.kz İnbusiness.kz silteme jasap.
Ony jekemenshik mektepter de saqtaýǵa mindetti bolady. Birden aıta ketelik, burynǵyǵa qaraǵanda, kanıkýldar birshama qysqarady, sol arqyly oqý aptalary uzarmaq.
Sonymen, menshik nysanyna jáne vedimistik baǵynystylyǵyna qaramastan, orta bilim berý uıymdarynda oqý jylynyń bastalýy, uzaqtyǵy jáne kanıkýly kezeńderiniń kelesi merzimderi aıqyndalady:
- 2022–2023 oqý jyly dástúrli túrde 2022 jylǵy 1 qyrkúıekte bastalady. Bıylǵy jyly «Bilim kúni», 1 qyrkúıek apta ishinde beısenbige tuspa-tus keledi.
- Jańa oqý jylynyń uzaqtyǵy 1-synyptarda 35 oqý aptasyn quraıdy. Al 2–11 jáne 12-shi synyptarda 36 oqý aptasyna sozylady. Salystyrsaq, 2021–2022 oqý jylynda oqý jylynyń uzaqtyǵy 1-synyptarda 33 oqý aptasyn, al 2–12-synyptarda 34 oqý aptasyn quraǵan bolatyn.
- Oqý jyly ishindegi kanıkýl kezeńderi bylaısha belgilenip otyr: 1–11 (12), ıaǵnı barlyq synyptarda kúzgi kanıkýl 7 kúndi quraıdy. Iaǵnı, 2022 jylǵy 31 qazannan 6 qarasha aralyǵynda. Qysqy kanıkýl – 9 kún: 2022 jylǵy 31 jeltoqsan men 2023 jylǵy 8 qańtar aralyǵynda. Kóktemgi kanıkýl 9 kúndi - 2023 jylǵy 18–26 naýryz aralyǵyn qamtıdy. Salystyra ketsek, bıylǵy kóktemde aıaqtalǵan aldyńǵy oqý jylynda 1–12-synyptarda kúzgi kanıkýl 7 kúnge (2021 jylǵy 1-7 qarasha aralyǵyna), qysqy kanıkýl 18 kúnge (2021 jylǵy 30 jeltoqsan men 2022 jylǵy 16 qańtar aralyǵyna), kóktemgi kanıkýl 12 kúnge (2022 jylǵy 19-30 naýryz aralyǵyna) sozylǵan.
- 1-synyptarda 7 kúndik qosymsha kanıkýl belgilenedi: ol 2023 jylǵy 6–12 aqpan aralyǵynda beriledi. Aldyńǵy oqý jylynda bul bonýs-kanıkýl 7–13 aqpan aralyǵynda usynylǵan.