Almatyda polısıa azamattardy jolda saq bolýǵa shaqyrady, - dep habarlaıdy Aqshamnews.kz.
Qazaqstannyń birqatar óńirinde, sonyń ishinde Almaty qalasy aýmaǵynda jaýyn-shashyn, aıaz bolady jáne aýa temperatýrasy birshama tómendeıdi. Ádette, aýa raıynyń nasharlaýy jalpy jol-kólik jaǵdaıyna áser etedi. Osyǵan baılanysty Almatyda turǵyndaryna polısıa jol qozǵalysy erejelerin jáne qaýipsizdik sharalaryn qatań saqtaýdy eske salady.
Quqyq qorǵaý qyzmetkerleri júrgizýshilerdi saqtyq pen qyraǵylyq tanytýǵa, sondaı-aq kólik quraldaryn qysqy maýsymǵa aldyn ala daıyndaýǵa shaqyrady.
- Jaýyn-shashynnyń mol túsýi qaladaǵy jol qozǵalysyn aıtarlyqtaı qıyndatatyny belgili: keptelister bolady. Biraq tájirıbe kórsetip otyrǵandaı, mundaı jaǵdaılardyń basty sebebi — jol qozǵalysyna qatysýshylardyń tártipsizdigi: keıbir júrgizýshiler jyldamdyqty tómendetpeıdi, apattyq jaǵdaı týdyrady, qaýipti manevrler jasaıdy, ózara syılastyq tanytpaıdy, al jaıaý júrginshiler joldy ruqsat etilmegen jerden kesip ótedi. Munyń bári joldaǵy jaǵdaıǵa keri áserin tıgizedi, — dedi Almaty qalasy PD qoǵamdyq qaýipsizdik basqarmasy bastyǵynyń orynbasary Tımýr Noǵaıbaev.
Sonymen qatar departamentte tájirıbege sáıkes, jol-kólik oqıǵalarynyń sany aýa raıy nashar kúnderi aıtarlyqtaı artatyny aıtyldy.