Elordada Qalıbek Qýanyshbaev atyndaǵy Memlekettik akademıalyq qazaq mýzykalyq drama teatrynda Ózbek kınosy kúnderiniń saltanatty ashylýy ótti
QR Mádenıet jáne sport mınıstrligi dereginshe, Ózbekstan prezıdenti Shavkat Mırzıóevtiń Qazaqstanǵa memlekettik sapary barysynda uıymdastyrylǵan mádenı is-sharaǵa Ózbekstannyń belgili kınorejısserleri men akterleri qatysty, dep habarlaıdy Almaty-akshamy.kz
Ózbekstannyń kınematografıster delegasıasyn «Ózbekkıno» ulttyq agenttiginiń bas dırektory Fırdavs Abdýhalıkov bastap keldi.
Alqaly jıynǵa Qazaqstan tarapynan QR Mádenıet jáne sport mınıstri Aqtoty Raıymqulova, QR Mádenıet jáne sport mınıstrligi Mádenıet komıtetiniń tóraǵasy Aqan Ábdýalıev, «Qazaqfılm» kınostýdıasynyń prezıdenti Aqan Sataev, sondaı-aq elimizdiń kıno óneriniń kórnekti qaıratkerleri qatysty.
İs-shara barysynda Qazaqstan men Ózbekstan arasynda kınematografıa salasy boıynsha qarym-qatynas pen tájirıbe almasý maqsatyndaǵy ekijaqty memorandýmǵa qol qoıyldy.
Jıynda sóz alǵan Aqtoty Raıymqulova kópshilikti Ózbek kınosy kúnderiniń ashylýymen quttyqtady.
«Qazaq pen ózbek halyqtarynyń mádenı baılanysynyń tamyry tereńde jatyr. Bizdiń ótken shaǵymyz ortaq, rýhanı muramyz da orasan. Tilimiz, dinimiz, dilimiz bir. Osy ótkizilip otyrǵan shara – osynyń bir aıǵaǵy.
Ózbek mádenıeti men óneri, ásirese, kıno óneri qazaqstandyqtar arasynda keńinen tanymal. Ózbek teleserıaldary bizdiń kórermen úshin etene tanys. Úsh kún boıy, ıaǵnı, jeltoqsannyń altysy men segizi aralyǵynda biz úshin Ózbekstan kınosynyń zamanaýı týyndylarymen tanysý múmkindigi týyp otyr. Ózbek fılmderi kınoteatrlarda ǵana emes, respýblıkalyq telearnalarda da kórsetiletin bolady»,- dedi Mádenıet jáne sport mınıstri.
Sonymen qatar «Ózbekkıno» ulttyq agenttiginiń bas dırektory Fırdavs Abdýhalıkov aldaǵy ýaqytta baýyrlas eki el arasynda, ortaq jobalardy júzege asyrýǵa nıetti ekenin jetkizdi.
«İs-shara Ózbekstan Prezıdentiniń Qazaqstanǵa kelýine oraı ótkizilip jatyr. Búgingi tańda Ózbekstan kınematografıacy qazaqstandyq kıno salasyna ortaq jobalar jaıly usynys jasaı alatyndaı dárejede ekenin maqtanyshpen aıtamyz. Ózbekstan tarapynan baýyrlas eki eldiń dostyǵyn beıneleıtin «Mıros» jáne «Abaı» atty eki fılmdi usynyp otyrmyz.
Jas mamandarymyz da tájirıbe almasýǵa daıyn. Búgin «Shabyt» ulttyq óner akademıasynda qonaqta boldyq. Atalǵan oqý ornynda bolashaq mamandarǵa barlyq jaǵdaı jasalǵanyn kórdik. Búgingi memorandým aıasynda ortaq jobalarymyzdyń qatary artady degen úmittemin»,- dedi Fırdavs Abdýhalıkov.