Otbasynyń tabysy eskerilip, nesıe jylyna 2-5% mólsherlememen beriledi.
«Otbasy bank» baspana kezeginde turǵan azamattar úshin bastapqy jarnany tómendetedi. Indýstrıa jáne ınfraqurylymdyq damý mınıstri Beıbit Atamqulov bunyń ıpotekalyq baǵdarlamalar aıasynda júzege asatynyn aıtty, dep habarlaıdy Almaty-akshamy.kz Informburo.kz-ke silteme jasap.
«Páter alý úshin kezekte turǵan azamattar úshin bastapqy tólem 10%-ǵa deıin tómendeıdi. Otbasy tabysyna baılanysty nesıe jylyna 2-5% mólsherlememen beriledi», – dedi mınıstr.
Munymen qatar, Beıbit Atamqulov jetkilikti sheginen asqan soń zeınetaqy jınaǵyna kelip túsken aqshany «Otbasy banktegi» shotqa aýdaryp otyrýǵa ruqsat berýdi tapsyrdy.
«Zeınetaqy jınaqtaryn paıdalaný erejelerine jınaqtaǵy qarajat jetkilikti sheginen asqan soń, qalǵanyn «Otbasy banktegi» shotqa aýdaryp otyrýǵa múmkindik beretin ózgertýler engiziledi. Bul azamattardyń turǵyn úı jaǵdaıyn jaqsartý úshin jasalady», – dep qosty mınıstr.
Budan ózge, Beıbit Atamqulov ázirleýshilerdi qoldaý maqsatynda MJÁ men úlestik qurylystyń áleýetin belsendi paıdalana otyryp jobany qarjylandyrý mehanızmi engiziletinin túsindirdi.
Eske salsaq, úı kezegindegi turmysy tómen jandarǵa páterdi jalǵa alýǵa beriletin sýbsıdıanyń aldyn ala mólsheri belgili bolǵany týraly habarlaǵan edik. Memlekettik kómektiń eń joǵary máni Almaty qalasynda: páterdiń 1 sharshy metrine – 0,55 AEK (bıyl 1 604 teńge) mólsherinde sýbsıdıa beriledi.