«Qarasaz kósheleri» dep atalatyn ádebı-tanymdyq derekti fılm kórermenge jol tartty
Tanystyrylymy Jazýshylar odaǵynda ótken jańa fılm óziniń shynaıylyǵymen birden baýrap aldy.
Elý mınýttyq týyndynyń ón boıyna Qarasaz halqynyń Muqaǵalı aqynǵa, onyń shyǵarmalaryna degen sheksiz mahabbaty ózek bolyp órilgen. «Úırek ushyp, qaz qonǵan» qasıetti Qarasazdy betke alyp, jolǵa shyqqan qos jigittiń biri, aqyn týǵan mekenniń tól perzenti, Qazaqstannyń eńbek sińirgen qaıratkeri, M.Áýezov atyndaǵy ulttyq teatrdyń beldi ártisi Erkebulan Daıyrov saparlas serigi, belgili syqaqshy Oljas Sydyqbektiń "Osy Qarasazda eńbektegen baladan eńkeıgen kárige deıin Muqaǵalı jyrlaryn jatqa oqıtyny ras pa?" degen kúmánin seıiltýge kúsh salady. Qarasýǵa shomylyp júrgen balalardyń da, kók maısaǵa shalǵy salǵan shópshilerdiń de, jolda toqtatqan traktordan qarǵyp túsken mehanızatordyń da, dúkendegi satýshynyń da, kóshede kezdesken áıelderdiń de, baqshasynda júrgen aýyl turǵynynyń da, aq saqaldy atanyń da, túngi alaý janyndaǵy jastardyń da tura qalyp, muzbalaq aqynnyń óleńderin múdirmesten oqı jónelýi kórermendi tánti etpeı turmaıdy. Fılmdi túsirýshilerdiń aıtýynsha, keıipkerler aldyn ala daıyndalmaǵan.
«Bul ıdeıa negizi 3-4 jyl buryn kelgen. Bárimiz de Muqaǵalıǵa qushtarmyz, óleńderin jaqsy kóremiz, biraq ony Qarasazdyń halqyndaı eshkim súıe almaıdy. Bajaılap qarasaq, aýzymyzdyń sýy quryp aıtatyn Qarasaz týraly ınternet keńistiginde tushshymdy dúnıe joq eken. Alaıda buǵan deıin múmkindik bolmady, sáti kelmedi. Bıyl qolǵa alyp, óz kúshimizben Muqaǵalı Maqataevtyń 90 jyldyq torqaly toıyna tolymdy tartý jasaý maqsatynda osy fılmdi túsirdik. Toqtar Muhamedı degen kásipker baýyrymyz qarjylaı demeý jasady. Fılmde oınaǵan Áset Imanbaev, Safýan Shaımerdenov sekildi belgili teatr jáne kıno akterleri, dástúrli án óneriniń beldi ókili Tileýles Qurmanǵalıev, rejıssór Jandos Espenbetov, kompozıtor Ermek Elgezek, montaj rejıseri Nurkeldi Ergóbek, basqa da jigitter shama-sharqynsha óz úlesterin qosty. Fılmdi túsirý barysynda Qarasazdy tabıǵı qalpynda, eshbir jasandylyqsyz berýge, Muqaǵalı óleńderine jazylǵan ánderdi de paıdalanýǵa tyrystyq», - deıdi ıdeıa avtory, prodúser, «Qońyr media group» kompanıasynyń basshysy Serjan Moldasanuly.
«Kınodaǵy aýyl kórinisteri, kósheleri maǵan etene tanys. Balalyq shaǵymyz Qarasaz, Qarasý ózenderiniń boıynda ótti. Qarasazdyń tamyljyǵan tabıǵatyna tamsanyp otyryp, bir saǵattyń qalaı ótkenin baıqamaı da qaldyq. Adam men tabıǵattyń, qarapaıymdylyq pen shynaıylyqtyń úılesimin tapqany sondaı, aýylǵa baryp kelgendeı kúı keshtik», - dep áserimen bólisken aqynnyń uly Juldyz Maqataev pen kelini Baqytkúl fılmdi túsirgen shyǵarmashylyq topqa alǵys aıtty.
Muqaǵalı murasyn ulyqtap, óleńderiniń ómirsheńdigin pash etken jańa týyndynyń qazaq ónerindegi rýhanı keńistikti toltyratyn shyǵarmalar qatarynan tabylary daýsyz.