Bul týraly İle Alataýy ulttyq parkiniń aýmaǵyndaǵy Aıýsaı vızıt-ortalyǵynda ótip jatqan Qońyr aıý aptalyǵy aıasyndaǵy BAQ ókilderine arnalǵan baspasóz máslıhatynda aıtyldy.
Mamandar jýrnalıser nazaryna ulttyq parktiń florasy men faýnasy, ornatylǵan fototuzaqtardyń biregeı kadrlaryna ilinip qalǵan iri jyrtqyshtar, sonyń ishinde Tán-SHan qońyr aıýy týraly qundy málimetterdi usyndy. Tipti kórnekilik retinde aıýdyń bas súıegin de ala kelipti.
– Aq tyrnaqty aıý retinde tanymal Tán-SHan qońyr aıýy Qazaqstannyń Qyzyl kitabyna engizilgen. Alaıda sońǵy jyldary qazaqstandyq zoologtar men tabıǵatty qorǵaý jónindegi memlekettik ınspektorlardyń arqasynda onyń İle Alataýy taýlaryndaǵy popýlásıasy aıtarlyqtaı kóbeıdi. QR BǴM ǴK Zoologıa ınstıtýty ǵalymdarynyń esepteýi boıynsha, qazirgi tańda İle Alataýy ulttyq parkiniń aýmaǵynda shamamen 70 shaqty Tán-SHan qońyr aıýy tirshilik etedi. Ol İle Alataýynyń ár jerinde, sonyń ishinde atyna zaty saı Aıýsaı shatqalynda da taralǵan. 2010 jyldan bastap, kóktemnen kúzge deıin árbir mezgil saıyn jyrtqyshtardyń izderin jáne basqa da nyshandaryn taýyp, tirkeımiz, – deıdi QR BǴM ǴK Zoologıa ınstıtýtynyń terıologıa bóliminiń ǵylymı qyzmetkeri, Halyqaralyq aıýlar jónindegi mamandar asosıasıasynyń (IBA) múshesi, ekologıa magıstri Sanjar Qańtarbaev.
«İle Alataýy" MUTP ǵylymı-zertteý jumystary jáne taý agrobıoártúrliligi bóliminiń ǵylymı qyzmetkeri Tuńǵysh Japarqulov taýǵa kelýshilerge arnalǵan qaýipsizdik erejelerimen tanystyrdy.
«Aıý – adam úshin qaýipti ári myqty ań ekenin túsinýimiz kerek. Sonymen qatar onyń tirshilik ortasyna barmas buryn daıyndalyp, tirshiligi týraly bilý qajet. Aıýsaı vızıt-ortalyǵynyń qyzmetkerleri shatqalda demalatyn adamdarǵa túsindirý jumystaryn júrgizip, olardan úshinshi sarqyramadan joǵary kóterilmeýin ótinedi. Óıtkeni onda aıýlar soqpaǵy bar jáne olardy keziktirý yqtımaldylyǵy joǵary. Sondyqtan taýǵa attanbas buryn Qońyr aıý aptalyǵy aıasynda ótetin dáristerge qatysýǵa keńes beremiz», – dedi ol.
Atalǵan bólimniń bastyǵy Saltanat Ýserbaevanyń aıtýynsha, is-shara İle Alataýy ulttyq parkiniń aýmaǵynda tirshilik etetin Tán-SHan qońyr aıýynyń uıqydan oıanatyn mezgili, ıaǵnı 15-21 naýryz aralyǵyna oraılastyrylǵan. Aptalyq aıasynda Almaty qalasyndaǵy joǵarǵy oqý oryndarynyń stýdentterine, mektep oqýshylaryna, ortalyq qonaqtaryna arnalǵan tegin dárister ótedi. Olar Qazaqstannyń jetekshi terıologtarymen tanysyp, ekskýrsıalarǵa qatysady, «Myń Kóz" soqpaǵymen (vızýaldyq tujyrymdamasynyń avtory Sanjar Jubanov) júrip otyryp, aıýdyń shynaıy izderin tamashalap, ózge de tirshilik nyshandaryn tanýdy úırenedi.
Mundaı is-sharalar qorshaǵan orta máselelerine qoǵamnyń nazaryn aýdarady, otandastarymyzdyń ekologıalyq ustanymyn jáne qalamyzdyń, oblysymyzdyń taý ekojúıelerin saqtaýǵa daıyndyǵyn damytýǵa kómektesedi.