16 qyrkúıekten bastap Qylmystyq kodekske jańa 125-1-baby "Neke qıýǵa májbúrleý" engizildi.
Bul norma adamdy onyń erkinen tys nekege turǵyzý nemese birge turý maqsatynda urlaǵany úshin qylmystyq jaýapkershilikti qarastyrady, - dep habarlaıdy Polisia.kz.
Endi mundaı áreketter aýyr qylmys retinde saralanady jáne kináliler jeti jylǵa deıin bas bostandyǵynan aıyrylýy múmkin. Al aýyr jaǵdaılarda jaza 10 jylǵa deıin ulǵaıady.
Buryn jábirlenýshini óz erkimen jibergen jaǵdaıda qylmystyq jaýapkershilikten bosatýǵa múmkindik beretin norma alynyp tastaldy. Endi jaza jábirlenýshini bosatqanyna qaramastan taǵaıyndalady. Jańa ózgerister kúshine engen sátten bastap ishki ister organdarynyń bólinisteri Qaraǵandy, Mańǵystaý, Jambyl, Túrkistan oblystarynda jáne Shymkent qalasynda neke qıýǵa májbúrleý derekteri boıynsha jeti qylmystyq is qozǵady. Júrgizilgen sharalar nátıjesinde 15 adam ustaldy. Árbir is boıynsha sotqa deıingi tergeý júrgizilip, qylmystardyń barlyq mán-jaılary anyqtalýda. İshki ister mınıstrligi azamattardy zorlyq-zombylyq pen nekege májbúrleý jaǵdaılaryna beıjaı qaramaýǵa shaqyrady.
Mundaı faktiler týraly aqparatyńyz bolsa, dereý 102 nómiri arqyly polısıaǵa habarlasyńyz. Mınıstrlik qyz alyp qashý faktileriniń aldyn alý jáne áıelderdi zorlyq-zombylyq pen májbúrleýdiń kez kelgen túrinen qorǵaý baǵytyndaǵy jumystardy jalǵastyrady.