Qazaqstan halqynyń jartysyna jýyǵy áli de qorǵalmaǵan
Eýropanyń keıbir elderi men kórshiles Ózbekstan da COVID-19-ǵa baılanysty karantındik shekteýlerden bas tartýda. Qazaqstanda bul múmkin be? Bul saýalǵa qatysty ǵalymdar óz oılarymen bólisti, dep habarlaıdy Almaty-akshamy.kz zakon.kz saıtyna silteme jasap.
Asfendıarov atyndaǵy QazUMÝ ǵalymdary derbestendirilgen jáne preventıvti medısınany engizýdiń ǵylymı-tehnıkalyq ulttyq baǵdarlamasyn iske asyrý sheńberinde Qazaqstanda karantındik shekteýlerdi tolyǵymen alyp tastaý qanshalyqty oryndy degen suraqqa jaýap berýge tyrysyp kórdi.
Ǵalymdar koronavırýstyń taralý erekshelikterin zerdeleı kele, ony emdeý joldary boıynsha mamandarǵa usynystar jasaǵan. Baǵdarlama 2021 jyldyń 1 qyrkúıeginen bastap júzege asyrylyp keledi.
Qazaqstan aýmaǵynda taralǵan COVID-19-dyń epıdemıologıalyq zertteýi kóbine osy aýrýdyń 40 paıyzy sımptomy bilinbeıtin túrge jatatynyn kórsetti.
Sonymen qatar, COVID-19-dyń aýyr júrýi men ólimge ákelip soqtyrý jaǵdaılary naýqastyń jasyna jáne qosalqy júretin aýrýlardyń bolýyna tikeleı baılanysty bolyp keledi.
Sondaı-aq balalar arasynda COVID-19 epıdemıologıasyn zertteý nátıjeleri de jarıalandy, ondaǵy derekter boıynsha Qazaqstanda balalarda COVID-19 juqtyrý jaǵdaılarynyń kópshiligi sımptomy bilinbeıtinge nemese belgileri ortasha deńgeıde bolǵany atap ótiledi.
Osy jaǵdaılardy esepke ala otyryp, ǵalymdar: "Shekteýlerdi alyp tastaý kerek pe" degen mańyzdy suraqqa jaýap berýi kerek bolady. Mamandar Qazaqstannyń úsh iri qalasynda SARS-CoV-2 vırýsyna qarsy antıdenelerdiń taralýyn zerttedi.
Alynǵan nátıjeler seroprevalenttiliktiń aqylǵa qonymdy deńgeıine qaramastan, elimizde ujymdyq ımýnıtettiń bazalyq deńgeıi áli ıgerilmeı jatqanyn kórsetedi. Aýrýdyń asımptomatıkalyq nemese sýbklınıkalyq túrleriniń taralýyn baǵalaý kórsetkishi 64-ten 81%-ǵa deıin ózgerdi.
Osylaısha, Qazaqstan halqynyń jartysyna jýyǵy áli de qorǵalmaǵanyn eskere otyryp, halyqty SARS-CoV-2 berilýinen qorǵaý úshin áleýmettik qashyqtyq, medısınalyq betperdeni paıdalaný jáne vaksınalaý sıaqty profılaktıkalyq strategıalardyń mańyzdylyǵy óz kúshinde qala beredi, dedi QazUMÝ ǵalymdary.
Sondaı-aq zertteýler aıasynda vaksınalaý kezinde áleýmettik toptarǵa basymdyq berý boıynsha usynystar usynyldy.
Mysaly, ǵalymdar josparly otaǵa muqtaj naýqastarǵa jalpy halyqqa qaraǵanda basymdyq berýdi usynady. Iaǵnı, olardy birinshi kezekte vaksınalaý ózekti.
Sonymen qatar COVID-19-dan emdelgen naýqastardy, oǵan qaraıtyn qamqorshylary men týystaryn ınfeksıadan qorǵanysyn arttyrý usynylady.
Sonymen birge ǵalymdar jekelegen naýqastar úshin hırýrgıalyq qyzmetterdiń keń spektrin qalpyna keltirý qaýipsiz bolady degen qorytyndyǵa keldi.