Bul týraly Baqytjan Saǵyntaevtyń tóraǵalyǵymen ótken Almatynyń tynys-tirshiligin qalpyna keltirý jónindegi qalalyq shtab otyrysynda ákimniń orynbasary İlıas Óserov málimdedi, dep habarlaıdy Almaty-akshamy.kz.
Áńgime memlekettik organdardyń, aýrýhanalar men BAQ-tyń zardap shekken 603 qyzmetkerine ótemaqy tólemderi týraly bolyp otyr. Onyń ishinde: 592 quqyq qorǵaý organdarynyń qyzmetkeri, tótenshe jaǵdaılar departamentiniń 1 qyzmetkeri, jergilikti atqarýshy organdardyń 3 qyzmetkeri, «Almaty» telearnasynyń 1 qyzmetkeri jáne medısınalyq uıymdardyń 6 qyzmetkeri.
İlıas Óserovtyń aıtýynsha, tólemder aýyr dárejede zardap shekkenderge 2 mln teńge, ortasha dárejede – 1 mln teńge, jeńil túrde – 500 myń teńge esebinen júrgiziledi.
Sonymen qatar, TJ kezinde jumyldyrylǵan polısıa departamentiniń 3878 qyzmetkerine, tótenshe jaǵdaılar departamentiniń 1207 qyzmetkerine, qoǵamdyq densaýlyq basqarmasynyń 3888 qyzmetkerine, qutqarý qyzmetiniń 93 qyzmetkerine 100 myń teńge kóleminde qarjylaı kómek tólenedi.
«Búgin tıisti qujattar qazynashylyqqa jiberilip, tústen keıin alǵashqy tólemder jasalady», - dep atap ótti Almaty ákiminiń orynbasary.
Polısıa departamentine tıisti tergeý áreketteri aıaqtalǵannan keıin zardap shekken avtokólikterge tólemderdi qamtamasyz etý úshin shamamen 200 mln teńge mólsherinde bastapqy soma jiberiletin bolady. Qajet bolǵan jaǵdaıda bul soma kóbeıtiledi.