El aýmaǵynda 1450 adam senim telefonyna habarlasyp, túrli kómek suraǵan
Bıyl turmystyq zorlyq-zombylyqqa ushyraǵandardyń sany 2 ese ósken. El aýmaǵynda 1450 adam senim telefonyna habarlasyp, túrli kómek suraǵan, dep habarlaıdy Almaty-akshamy.kz Almaty.tv-ge silteme jasap.
Aıbara Ǵazız 4 jyl buryn turmystyq zorlyq-zombylyqqa ushyraǵan. Taǵdyrdyń qıyndyǵyna moıymaǵan keıipker – 5 balanyń anasy. Ol psıhologıalyq qıyndyqqa qaramastan, búginde óz kásibin dóńgeletip otyr.
«Psıhologpen jumys jasaǵannan keıin, meniń ózimde de namys oıana bastady. «Men bul jerde jatýǵa mindetti emespin, tirshilik isteýim kerek» dep 40 myń teńgege kishigirim mashınkamdy alyp sol jerde jastyq, kórpe tigip, aqsha jınadym. Qazirgi tańda mende eki kompanıa bar, ony maqtanyshpen aıtamyn. Ásirese, kópbalaly analarmen jumys jasaımyz», – dedi kásipker Aıbara Ǵazız.
Aıbaranyń aıaqtan tik turýyna daǵdarys ortalyǵy tikeleı sep bolǵan. 8 baǵytta kómek kórsetip, áleýmettik qoldaý jasaıtyn mekemeniń ashylǵanyna bıyl 5 jyl tolyp otyr. Mereıli kúnde bas qosqan mamandar óz qyzmetterin qoǵamnyń jaqsarýyna úles qosatyny úshin jaqsy kóredi, qulshynyp isteıdi. Sońǵy 5 jylda olardyń kómegine 4000-nan astam adam júginipti. Olardyń bári – otbasylyq túsinispeýshiliktiń qurbandary.
Áıelderdiń taǵdyry ártúrli. Biraq bárin bir nárse biriktiredi. Ol – zorlyq-zombylyqqa qarsy erik-jiger, taǵdyr salǵan tezge kónbeý, týra jol taba alý. Al bul jolda olarǵa janǵa saıa bolǵan ortalyq kómektesken.
Merekelik is-sharaǵa bir kezderi ortalyqty pana tutqan analar da qatysty. Kópshilik úshin qolóner buıymdary kórmege qoıyldy. Kelgenderdi keri qaıtarmaı, kerisinshe qol ushyn sozatyn mekemeniń ózi kemi 50 adamǵa arnalǵan. Biraq mamandar aı-aptalap, keıde kún saıyn jańa oqıǵanyń kýási bolamyz deıdi.
«Standartqa sáıkes, kelip túsken áıelder bizde 6 aı aralyǵynda turýǵa múmkindigi bar. Biraq ár kelgen áıeldiń óziniń jeke jaǵdaıyna baılanysty merzimdi bekitemiz», – dedi áleýmettik qyzmetker Zúlfıa Omarova.
2017 jyldan bastap «Jan-saıa» daǵdarys ortalyǵyn 867 bala men 474 áıel pana etken. Al jalpy senim telefonyna habarlasyp, qol ushyn sozýdy suraǵandardyń sany kóp. Sońǵy 5 jylda mundaı 1341 adam baspanaǵa ornalasyp, 719-y zańgerlik keńes alsa, psıhologtyń kómegine júgingen 2082 jaǵdaı tirkelip otyr.