Áli kúnge kóz aldymyzda týǵan-týys, tanystyń arasynda sońy qaıǵyǵa aparyp jatqan indettiń taralýyna qaramastan, halyq koronavırýsqa jeńil-jelpi naýqas sıaqty qarap keledi.
Turǵyndarmen dástúrli onlaın júzdesýinde Almatynyń ákimi osylaı dedi, dep habarlaıdy Almaty-akshamy.kz tilshisi.
«Halqymyzdyń amandyǵy úshin polısıa qyzmetkerlerine meıramhana, túngi klýbtardy kúzettirýge májbúr bolyp otyrmyz. Olardyń negizgi qyzmeti –turǵyndardyń qaýipsizdigin saqtaý ekenin bilesizder. İndettiń osynsha asqynyp turǵanyn bile tura, qydyrmaı qoıa turýǵa, shydaýǵa bolmaı ma? Budan artyq qalaı aıtamyn endi? Halyq osy betimen júre berse, tipti budan da qatań sharalar qoldanýymyz kerek shyǵar», - dedi megapolıs basshysy.
Sonymen qatar Baqytjan Ábdiruly árkim óz densaýlyǵy úshin jaýapty bolsyn degendi qadap aıtty.
«Áleýmettik jelide otyryp alyp, ekpege qarsy nasıhat aıtatyn antıvakser sizdiń densaýlyǵyńyz úshin jaýapty emes. Ol úshin tikeleı ózińiz jaýaptysyz. Bul ońaı indet bolsa, áldeqashan jeńip shyqqan bolar edik, arpalysyp kele jatqanymyzǵa bir jarym jyl boldy ǵoı. Vırýs mýtasıalanyp, ár túrli shtamdary paıda bolyp jatqanyn bilesizder. «Delta» shtamynyń tipti aýyr soǵatyny, jyldam taralatyny belgili boldy. Bul shtamnyń óte tez juǵatyny sondaı, aýrýhanalarǵa otbasymen túsip jatqan naýqastar bar. İndetti tolastatýdyń jalǵyz-aq joly bar, ol –ekpe saldyrý. Búgingi jaǵdaıymyzdy jaqsartamyz desek, ekpeniń qajettiligin túsinetin ýaqyt keldi. Sanepıdemıologtardyń aıtqanyna baǵynaıyq», -dedi qala ákimi.