Pensılvanıa shtaty ýnıversıtetiniń ǵalymdary osyndaı málimdeme jasaǵan.
Adam organızmi dene temperatýrasyn ózi rettep otyrýǵa beıimdelgen.
Teorıalyq turǵydan túsindirsek ol syrtqy faktorlarǵa táýelsiz. Biraq Pensılvanıa ýnıversıtetiniń ǵalymdary ystyq kúnniń adamǵa keri áserin anyqtaǵan, dep habarlaıdy Almaty-akshamy.kz.
24.kz taratqan aqparatqa saı, ǵylymı tájirıbege 24 erikti qatysty. Olar arnaıy orynda túrli temperatýralyq jaǵdaıda baqylaýda boldy. Synap baǵanasy 35 gradýstan asqanda adamnyń ishki temperatýrasy toqtaýsyz kóterile bastaıdy. Demek uzaq saqtalatyn ystyqtyń adam densaýlyǵyna zıany bar. Zertteý qorytyndylary synap baǵanasy 31 gradýsqa jetkende-aq densaýlyǵy myqty jas adamnyń dene temperatýrasynyń ózi kóterilip ysı bastaıtynyn kórsetip otyr.
Bul derekter Eýropadaǵy byltyrǵy ystyqta ólim-jitimniń nelikten kóbeıgenin túsindiredi. Ol kezde kári qurlyqta 60 myń adam kóz jumǵan edi. Qaıǵyly oqıǵanyń kóbi Italıa, Ispanıa jáne Germanıada tirkeldi. Djon Nern, aýa raıyn zertteýshi ǵalym: - Qazir ǵalamdyq temperatýra 1980-shi jyldardaǵy kezeńmen salystyrǵanda joǵary. Jyl saıyn mı qaınatar ystyqtyń qaıtalanýy artyp keledi. Sondyqtan qazir álemde aýa raıy qalypty dep aıtýǵa kelmeıdi.
Al sońǵy málimetke súıensek, keıingi birneshe aptada Eýropa, Azıa jáne Soltústik Amerıkada aptap ystyq bir ýaqytta ornaǵan. Kalıfornıanyń shóleıtti dalasynda synap baǵanasy 53 gradýsqa deıin kóterildi. Ǵalymdardyń boljaýynsha bıyl aýa temperatýrasy rekordtyq kórsetkishke jetip tarıhtaǵy eń ystyq jyl tirkelýi múmkin.