Jetisý aýdany boıynsha 69 kóshede 102 shaqyrym aryq jelisi bar
Almatynyń Jetisý aýdanynda jaýyn jaýsa, sý alyp ketetin aımaqtarǵa jóndeý júrgizildi, dep habarlaıdy Almaty-akshamy.kz Almaty.tv-ge silteme jasap.
Jetisý aýdanyndaǵy Kazakov kóshesinde salynǵan oıyn alańy alystan kóz tartady. Tek qazir aýa-raıynyń qolaısyzdyǵyna baılanysty onda asyr salǵan bala joq. Degenmen, mundaı demalatyn oryndy halyq kóp kútti. Ony surap, Almaty ákimimen kezdesýge de bardy. Araǵa biraz ýaqyt salyp ótinish oryndaldy. Qoldanysqa berilgen alańdy qos merdiger mekeme jasaǵan. Aýmaqta avtoturaq bar. Bolashaqta qaýipsizdik maqsatynda bir jaqty qozǵalysqa ǵana ruqsat etetin jol belgisi qoıylmaq. Jaıaý júrginshilerge aýmaq yńǵaıly bola túspek.
«Iá, shynynda buryn aýmaq kútimsiz qalǵan orman sekildi edi. Tek aǵashtary ǵana bolatyn. Qazir jaqyn mańda balabaqsha, balalardy mektepke daıyndaıtyn jekemenshik uıymdar jumys isteıdi. Munda jıi kelemiz. Oıyn alańyn kórgende qýandyq. Óıtkeni, balalardy sergip qalady, al olar sabaq oqýǵa ketkende ata-analarǵa demalyp alýǵa bolady», – dedi qala turǵyny Ásem Islambákıeva.
«Qazirgi tańda jumystar tolyq aıaqtalǵan. Jaryq berildi. Oryndyqtar, oıyn alańyna jańasha formattaǵy maf deımiz ǵoı, shaǵyn arhıtektýralyq pishinder qoıyldy. Qasyna qosymsha, jerdiń tapshylyǵyna baılanysty júgirý alańy qarastyryldy. Jattyǵý alańy, vorkaýt zattary qoıyldy», – dedi Jetisý aýdandyq komýnaldy sharýashylyq bóliminiń basshysy Nurdáýlet Qaldarov.
Jetisý aýdanynda sý basý qaýpi bar aımaqtar bar. Máselen, Brúsov kóshesiniń turǵyndary jaýyn jaýǵanda belýardan sý keshýge májbúrmiz dep shaǵymdandy. Al kóktem jańbyrly bolsa, qıyn. Dúıim el kezdesýde kúrmeýi kóp kúrdeli máseleni tezirek sheship berýdi suraǵan bolatyn.
Mamandar máseleni eni eki esege keńeıtilgen aryq sheshetinin aıtty. Jańasha salynǵan sýaǵar qatty sýdyń da qarqynyna tótep beretin kórinedi. Qazir jumystyń basym bóligi aıaqtalǵan. Aryqty temir torlarmen jabý ǵana qalypty. Olar ýaqytyly qoqystan tazartyp turý úshin alynbaly-salynbaly etip jasalady. Jalpy sý basý qaýpin boldyrmaý úshin aýqymdy shara qolǵa alyndy.
«Basqarmalarmen birigip, aımaqta 4 kolektorda, sonymen qatar 3 meken jaıda 1 kanalda kúrdeli jóndeý jumysy júrip jatyr. Bıyl tolyǵymen aıaqtaımyz. Aldaǵy ýaqytta sý basý máselesin aýdanda tolyǵymen shesheledi», – dedi Jetisý aýdandyq kóriktendirý bóliminiń basshysy Qýanysh Seıtimbetov.
Aıta keteıik, Jetisý aýdany boıynsha 69 kóshede 102 shaqyrym aryq jelisi bar. Qazir 47 meken jaıda 7,4 shaqyrym sýaǵar salyndy.