Bul týraly Almaty qalasynyń Óńirlik komýnıkasıalar qyzmetinde ótken brıfıńte aıtyldy, dep habarlaıdy Almaty-akshamy.kz.
«Kórkem Telekom» JSHS kompanıasynyń bıznesti damytý jónindegi dırektory Arman Álmerekov júrgizýshi tártibiniń jaqsarýyna beınebaqylaý júıesi áser etti dep esepteıdi. Muny jol-kólik oqıǵalardyń kórsetkishteri de kórsetip otyr. Osylaısha, «Sergek» kameralary ornatylǵaly beri jol-kólik oqıǵalarynan qaza bolǵandar sany 40%-ǵa (2019 jylǵy 161-den 2022 jyly 96-ǵa deıin) qysqardy.
Brıfıńte Almaty qalasy ákimdigi, Almaty qalasynyń polısıa departamenti jáne «Kórkem Telekom» JSHS arasynda memlekettik-jekemenshik áriptestik kelisimi aıasynda «Almaty qalasynyń zıatkerlik qaýipsizdik júıesi jáne jol qozǵalysy trafıgin taldaý» jobasy júzege asyrylyp jatqany eske salyndy. Jobanyń qýattylyǵy – 766 «Sergek» aparattyq-baǵdarlamalyq keshenderi (383 jelilik ýchaskelerde, 383 jol qıylystarynda).
«Jobany iske asyrý jol qozǵalysy qaýipsizdigin qamtamasyz etetin kameralardyń joldardaǵy apattardyń negizgi kórsetkishterin tómendetýge aıtarlyqtaı yqpal etetinin kórsetedi, óıtkeni joǵary jyldamdyq apat qaýpiniń artýyna da, zardaptardyń aýyrlyǵynyń artýyna da ákeledi. Búkil álem boıynsha júrgizilgen kóptegen zertteýlerge sáıkes, baqylaý kameralary aýyr jaraqattarmen nemese ólimmen bolatyn apattardy 11% -dan 44% -ǵa deıin tómendetýi múmkin. Osylaısha, «Sergek» kameralary ornatylǵannan beri jol-kólik oqıǵalarynan qaza tapqandar sany 40 paıyzǵa (2019 jylǵy 161-den 2022 jyly 96-ǵa deıin) azaıdy», - dedi Arman Álmerekov.
Spıker «Sergek» júıesi jol qozǵalysy qaýipsizdigin jaqsartýǵa ǵana kómektesip qoımatynyn túsiný mańyzdy ekenin atap ótti. Barlyq «Sergek» keshenderi arnaıy jelilik baqylaý kameralarymen jabdyqtalǵan, olar jelilik ýchaskeler men qıylystarda barlyq aparattyq-baǵdarlamalyq keshenderden barlyq oqıǵalar beınege túsiriledi, sol arqyly qoǵamdyq qaýipsizdikti baqylaýǵa múmkindik jasalǵan. Qajet bolǵan jaǵdaıda polısıa departamenti qala kóshelerinde oryn alǵan qylmystardy ashý úshin osy kameralardy paıdalanady.
Sergek júıesi táýlik boıy rejıminde keminde 30 kún boıy derekterdiń saqtalýyn qamtamasyz etedi. 30 kúndik beınesýretterdi saqtaý merzimi Ulttyq qaýipsizdik komıteti tóraǵasynyń buıryǵymen bekitilgen Ulttyq beınebaqylaý júıesiniń jumys isteý qaǵıdalarynda aıqyndalǵan.
Brıfıńtiń ekinshi qatysýshysy Almaty qalasy Sıfrlandyrý basqarmasy basshysynyń orynbasary Serik Baıǵanın «Sergek» zıatkerlik júıesi qalanyń kólik júıesiniń parametrleri boıynsha qaladaǵy kólikterdiń sany jáne olardyń negizgi baǵyttary, saparlardyń uzaqtyǵy jáne kólik quraldarynyń ekologıalyq áseri týraly kóptegen derekterdi jınaýǵa, óńdeýge jáne jınaqtaýǵa múmkindik beretinin aıtty. Mysaly, qazir Almatyda jumys kúnderi 555 myńǵa deıin kólik qozǵalady, onyń ishinde tańerteńgi jáne keshki qarbalas ýaqytta 170 myńǵa deıin kólik qozǵalysy baıqalady. Táýligine barlyq kólikter 16 mln km jol júredi. Osy derekterdiń kómegimen qaladaǵy tartylys aımaqtaryn anyqtaýǵa, bolashaq marshrýttardy boljaýǵa, sol arqyly qaladaǵy bolashaq jol-kólik qozǵadysynyń modelin qurýǵa bolady.
Serik Baıǵanın «Sergek» tek jol qaýipsizdigi ǵana emes, qoǵamdyq qaýipsizdikti de qamtamasyz etetinin atap ótti. Qaýipsizdik kameralary qoǵamdyq oryndarda, qalanyń krımınogendik aımaqtarynda, mektepterdiń janynda, turǵyn úılerdiń aýlalarynda ornatylǵan. Kameralardyń ornalasatyn jerin qalanyń Polısıa departamenti tek jol-kólik oqıǵalary men ondaǵy adam ólimi boıynsha ǵana emes, qoǵamdyq oryndarda jasalǵan qylmystyq jáne ákimshilik quqyq buzýshylyqtar boıynsha da jaǵdaıdy taldaýǵa baılanysty tańdaıdy.
Qazirgi ýaqytta júıeni 575 «Sergek» ABK keńeıtý josparlanýda (493 –jelilik ýchaskelerde, 82 – jol qıylystarynda). Bul bastamany júzege asyrý Almaty joldaryndaǵy ólim-jitim deńgeıin odan ári 30%-ǵa tómendetýge jáne qalanyń, ásirese, apatty jol ýchaskelerin tolyǵymen jabýǵa múmkindik beredi.
Sondaı-aq brıfıńte mańyzdy kórsetkishter aıtyldy. Almaty polısıa departamentiniń málimetinshe, 2022 jyly «Sergek» júıesi boıynsha jalpy somasy 8,332 mlrd teńgege 1 136 670 quqyq buzýshylyq tirkelgen. 2022 jyldyń jeltoqsan aıyndaǵy jaǵdaı boıynsha jalpy somasy 997,2 mln teńgege 85 442 quqyq buzýshylyq tirkeldi.
Ótken jyldyń derekterin alatyn bolsaq, júıe kúnine orta eseppen 3000-nan astam jol erejesin buzýdy tirkeıdi.
Qazirgi ýaqytta Almatydan basqa Qazaqstannyń jeti qalasynda «Sergek» júıesi jumys isteıdi: Astana, Óskemen, Atyraý, Shymkent, Túrkistan, Taraz, Semeı.