Óńirlik komýnıkasıalar alańynda Almaty qalasy qoǵamdyq densaýlyq saqtaý basqarmasy qalalyq qan ortalyǵynyń dırektory Jandos Nádirovtyń qatysýmen brıfıń ótti, dep habarlaıdy Almaty-akshamy.kz.
Spıkerdiń aıtýynsha, búginde álemdik tájirıbede qan donorlyǵy men onyń komponentterin damytýdyń biryńǵaı standarty qabyldanǵan – bul qan men onyń komponentteriniń óteýsiz donorlyǵyn damytý.
«Donor sózi latyn tilinen aýdarǵanda syılaýshy, ıaǵnı qaıtarymsyz degendi bildiredi. Qan donorlyǵyn nasıhattaý maqsatynda DDU 2005 jyly 14 maýsym – Dúnıejúzilik qan donory kúnin bekitti. Bul kúni búkil álemde qan tapsyrýshylarǵa qurmet kórsetiledi. Osy ýaqytqa deıin álemde donorlyq qan men onyń komponentteriniń analogy men almastyrǵyshtary joq, sondyqtan donorlyq qan men onyń komponentteriniń kózi adam bolyp otyr», - deıdi J.Nádirov.
Donorlyq birneshe túrge bólinedi. QR-da onyń kelesi túrleri bar:
- 450 ml kóleminde tolyq qan tapsyrý.
- aparattyq ádispen 400-600 ml kóleminde qan plazmasyn tapsyrý.
Qan jasýshalarynyń donorlyǵy:
Aparattyq trombosıtferez – kólemi 200-300 ml bolatyndaı 2*106-dan 8*106-ǵa deıingi jasýshalardyń sanynda donorlyq trombosıtterdi tapsyrý.
Aparattyq erıtrosıtteferez – 200-den 500 ml-ge deıin donorlyq erıtrosıtterdi, erıtrosıtterdi tapsyrý.
Donorlyqtyń túri men mólsherin qan ortalyǵynyń dárigeri donordyń ótinishi boıynsha emes, aýrýhanalardyń qajettilikterin, qan bankiniń jaǵdaıyn jáne donordyń fızıkalyq múmkindikterin eskere otyryp anyqtaıtynyn bilý mańyzdy.
Statısıkaǵa sáıkes, eń suranysqa ıe, qajet bop jatatyn qan toptary - oń rezýs faktorly birinshi jáne ekinshi qan toptary. Eń sırek kezdesetin qan túrleri – teris rezýs faktorlyq barlyq qan toptary.
«2020-2021 jyldardaǵy pandemıa kezeńinde medısınalyq uıymdarda josparly medısınalyq kómek kórsetýden bas tartýǵa jáne olardy COVID-stasıonarlarǵa qaıta beıindeýge baılanysty donorlyq 10%-ǵa tómendedi. 2022 jyly jaǵdaı kerisinshe ózgerdi, qan komponentterin tutynýdyń 10%-ǵa artýy baıqalady, soǵan baılanysty donorlyqtyń da dál osyndaı 10%-ǵa artýy baıqaldy», - dedi J.Nádirov.
Máselen, Almaty qalalyq qan ortalyǵynyń 2021 jylǵy statısıkalyq derekteri boıynsha qan jáne onyń komponentterin tapsyrý sany 16 961 bolsa, 2022 jyly donorlar sany 18 516-ǵa jetken. Paıyzdyq kórsetkishte 8-9 paıyzǵa ósken.
Donorlardy qabyldaý kestesi: dúısenbiden senbige deıin 9.00-den 15.00-ge deıin.
Baılanys telefondary: qabyldaý bólimi 8 727 338 23 82, jalpy 8 727 338 23 81.