Almatyda qala ákimi Erbolat Dosaevtyń tóraǵalyǵymen merdigerlik uıymdar basshylarynyń, ǵylymı mekemeler men tehnıkalyq qadaǵalaý mamandarynyń, jol-qurylys materıaldaryn jetkizýshilerdiń qatysýymen qalanyń jol ınfraqurylymyn damytý máseleleri jóninde keńes ótti, dep habarlaıdy Almaty-akshamy.kz.
Keńes barysynda jol ınfraqurylymyn damytýdyń 2022 jylǵa arnalǵan jumys josparynyń oryndalýy týraly esep tyńdaldy. Josparǵa jolaıryqtaryn salý, kóshelerdi uzartý, jol salý, ortasha jáne aǵymdaǵy jóndeý jumystaryn júrgizý, sondaı-aq jol qozǵalysyn uıymdastyrý jáne t.b. kiredi.
Búginde qala joldarynda óndiriletin jumys tehnologıasyn saqtaý jáne jol-qurylys materıaldarynyń sapasy boıynsha problemalar bar. Paıdalanylatyn materıaldar qozǵalystyń ıntensıvtiligine baılanysty jolǵa túsetin júktemeniń ósýine tótep bere almaıdy, buǵan kóshelerdegi turaqty aqaýlar – paıdalanýdaǵy aqpalar, tipti kepildi qoldaný kezindegi joltaban, jaryqtar dálel bola alady.
Keńeste jol qurylysy kezindegi negizgi buzýshylyqtar men jol ınfraqurylymynyń aqaýlary týraly baıandaldy. Almaty qalasy boıynsha Jol aktıvteriniń sapasy ulttyq ortalyǵynyń derekteri boıynsha ótken jyly 1100 ınspeksıalyq jol júrýdiń qorytyndysy boıynsha jol-qurylys materıaldarynyń 3 myńǵa jýyq synamasy iriktelip, synaldy. Nátıjesinde 800 synamanyń (nemese 27%) normatıvtik-tehnıkalyq qujattardyń talaptaryna sáıkes kelmeıtini anyqtaldy, jumys júrgizý tehnologıalarynyń buzylatyny tirkeldi. Qala basshysy merdigerlik uıymdarǵa kepildik mindettemeler aıasynda jasalǵan buzýshylyqtardy óz qarajaty esebinen tolyq kólemde jáne bekitilgen merzimde joıýdy tapsyrdy. Budan basqa, Jol aktıvteri sapasynyń ulttyq ortalyǵyna oryndalatyn jumystar men jol-qurylys materıaldarynyń sapasyn baqylaý úshin is-sharalardy ulǵaıtý tapsyryldy ári tekserý aımaqtary keńeıetin bolady. Eger buryn baqylaý aımaǵyna tek magıstraldyq joldar enetin bolsa, endi ekinshi deńgeıli, kvartal ishindegi jáne úıler arasyndaǵy joldar da baǵalanady. Ákim qajet bolǵan jaǵdaıda mundaı baqylaý is-sharalaryn qarjylandyrýdy ulǵaıtýdy qarastyrýǵa daıyn ekenin rastady.
Keńes barysynda máselelerdiń jeke blogy jol ınfraqurylymynyń qurylysy men qyzmet kórsetý sapasyn arttyrýǵa arnaldy. Qala basshysy álemde belsendi qoldanylyp júrgen ozyq tehnologıalar men zamanaýı materıaldarǵa, mysaly, polımer negizindegi bıtýmdy paıdalanýǵa kóshý múmkindigin qarastyrýdy tapsyrdy.
Erbolat Dosaev syrtqy túri tozǵan ári tehnıkalyq jaǵdaıy qanaǵattanǵysyz jol belgileri men konstrýksıalarynyń jaǵdaıyn synady. Kóshelerde tot basqan jáne óńsiz tirekter, jol qorshaýynyń qıraǵan qurylymdary bar. Jıi syrlaý praktıkasy tıimsiz jáne qymbat – mundaı tásilderdi túbegeıli ózgertý qajet. Merdigerge qazirgi zamanǵy berik materıaldarǵa, myryshtalǵan metal buıymdarǵa kóshý tapsyryldy. Qala basshysy sondaı-aq eskirgen baǵdarsham obektilerin jańǵyrtýdyń ekinshi kezeńin iske asyrý boıynsha jumystardy jedeldetýdi talap etti.
Almaty ákimi naryqtyń talaptaryna saı barlyq usynystardy pysyqtaýdy, sondaı-aq aǵymdaǵy jyldyń 16 mamyryna deıin qurylys jumystarynyń sapasyn arttyrý úshin standarttar men ádisterdi jetildirý boıynsha naqty sheshimderdi usynýdy tapsyrdy.
Búginde Almatynyń kóshe-jol jelisiniń uzyndyǵy 3096 km quraıdy, onyń 234 km qatty jabyny joq. Jaqsy jáne qanaǵattanarlyq jaǵdaıdaǵy joldar úlesiniń kórsetkishin 95%-ǵa deıin jaqsartý úshin 2025 jylǵa qaraı 290 km jańa jol salý, jyl saıyn uzyndyǵy keminde 200 km joldarǵa ortasha jóndeý jáne 350 myń sharshy metrden astam asfáltbeton jabynyna aǵymdaǵy jóndeý júrgizý josparlanýda.